JOEL 3:18 Ini nga tagna nagpapakita hin burabod nga naawas tikang ha santuaryo han templo. Naagos ito basi matubigan an mamara nga “Walog han Kakahoyan nga Akasya.” Salit hi Joel ngan hi Ezekiel pariho nakakita hin salog nga naghahatag hin kinabuhi ha uga nga lugar. Hinin duha nga asoy, an salog nagtitikang ha balay, o templo, ni Jehova.

ZACARIAS 14:8 Hi propeta Zacarias nakakita hin “buhi nga katubigan” nga naawas tikang ha syudad han Jerusalem. An katunga hito naagos ha dagat ha este, o Dagat nga Patay, ngan an katunga ha dagat ha weste, o Dagat Mediteraneo. An Jerusalem “an syudad han harangdon nga Hadi,” hi Jehova nga Dios. (Mat. 5:35) Salit an pag-unabi ni Zacarias hito nga syudad nagpapahinumdom ha aton han pagmando ni Jehova ha bug-os nga tuna ha maabot nga panahon. Maiha na naton nga nasabtan nga an katubigan dinhi hini nga tagna nagpapasabot nga bibendisyonan ni Jehova an duha nga grupo han matinumanon nga mga tawo ha Paraiso, adton makakatalwas ha daku nga kasakitan ngan adton babanhawon katapos hito.

PAHAYAG 22:1, 2 Hi apostol Juan nakakita hin simboliko nga salog nga pariho han nakita ni Ezekiel. Pero diri ito nagtitikang ha templo kondi ha trono ni Jehova. Salit pariho ha bisyon ni Zacarias, ini nga bisyon baga hin nagpapabug-at han mga bendisyon han pagmando han Dios ha Milenyo.

Syempre, gutiay la an kaibahan han mga bendisyon tikang ha pagmando ni Jehova ngan han mga bendisyon nga ginrirepresentaran han salog nga nakita ni Ezekiel. Ito ngatanan nga bendisyon nagtitikang kan Jehova ngan naagos ha ngatanan nga matinumanon nga katawohan.

SALMO 46:4 Tigamni nga ini nga bersikulo baga hin naghihisgot han duha nga butang​—pagsingba ngan pagmando. Makikita dinhi an usa nga salog nga nakakapalipay gud ha “syudad han Dios,” nga nagpapasabot han Ginhadian ngan pagmando, sugad man ha “baraan ngan harangdon nga tabernakulo han Gihitaasi,” nga nagpapasabot han putli nga pagsingba.

Ha kabug-osan, ini nga mga asoy nagpapasarig ha aton nga bibendisyonan ni Jehova an matinumanon nga katawohan ha duha nga paagi. Magpapahimulos kita ha kadayonan, siyahan, ha iya pagmando ngan, ikaduha, ha iya kahikayan ha putli nga pagsingba. Salit magin determinado kita yana nga padayon nga mangaro kan Jehova nga Dios ngan ha iya Anak hin “tubig nga buhi”​—an ira mahigugmaon nga mga tagana para ha kinabuhi nga waray kataposan!​—Jer. 2:13; Juan 4:10.