TZOLOK REHEBʼ LI NEKEʼKʼAMOK BʼE CHI XPUKTESINKIL XʼAWABʼEJILAL LI YOS. Bʼoqbʼilebʼ laj kʼamolbʼe saʼ li puktesink li wankebʼ 23 toj 65 chihabʼ re, re naq teʼwanq saʼ jun li chʼutam saʼ li Domingo ewu. Li chʼutam aʼin choʼq rehebʼ li nekeʼraj xkʼebʼal xtzʼaqobʼ li xkʼanjel chiru li Yos ut nekeʼraj xik saʼ li tzolebʼaal. Li yook chi bʼeresink re li chʼutam tixkʼe resil li hoonal ut li naʼaj bʼarwiʼ t-uxmanq.

CHOOTENQʼANQ RIKʼIN TUMIN. Naabʼal li tumin kiʼoksimank re naq chaabʼilaq qanaʼaj, kiʼoksimank li kʼanjelobʼaal re rabʼinkil li xyaabʼ kuxej ut re rilbʼal ebʼ li bʼideo, ut naabʼal chik li kʼanjelobʼaal li nokooxtenqʼa re naq tqataw rusilal li nimla chʼutam aʼin ut re naq toojiloq chiʼus chixkʼatq li Jehobʼa. Li tenqʼ tumin li nekeekʼe nakʼanjelak re xtojbʼal li sachomq aʼin ut re xtenqʼankil li kʼanjel li Yos saʼ chixjunil li Ruuchichʼochʼ. Ut re naq inkʼaʼ chʼaʼajkaq chaawu, yalaq bʼar taataw junaq li kaax li wank reetalil. Naqabʼanyoxi eere leetenqʼ. Li Nekeʼjolomink re Xmolam li Jehobʼa naraj xbʼanyoxinkil eere naq chi anchal eechʼool nekeetenqʼa rikʼin tumin li Xʼawabʼejilal li Jehobʼa.

CHUNLEBʼAAL. Naqatzʼaama chaawu naq twoxloqʼihebʼ li junchʼol. Jultikoʼq aawe naq kaʼajwiʼ taachap xnaʼaj laajunkabʼal, li xkohebʼ chaawix saʼ laabʼelebʼaal chʼiichʼ, li wankebʼ saʼ laawochoch malaj li nekeʼxtzol li Santil Hu aawikʼin. Maakʼe li kʼaru aawe saʼebʼ li naʼaj li inkʼaʼ yookat roksinkil.

KUBʼSINK HAʼ. Wi inkʼaʼ xkʼemank resil naq tjalaaq xnaʼajebʼ, ebʼ li naʼaj li wank toj chiru txokmanq choʼq rehebʼ li teʼkubʼeeq xhaʼ. Saʼ li kutan Sabado eqʼla teʼchunlaaq saʼeʼb li naʼaj aʼin naq toj maajiʼ natiklaak li seeraqʼ chirix li kubʼsink haʼ. Li teʼkubʼeeq xhaʼ teʼxkʼam chaq xtoʼaay ut xtʼikrebʼ (joʼ xkʼulubʼ aj paabʼanel) re naq teʼchʼikeʼq saʼ haʼ.

KʼULUL ULAʼ. Ebʼ laj kʼulul ulaʼ wankebʼ choʼq re aatenqʼankil. Abʼin chiruhebʼ naq teʼxye aawe bʼar taakʼe laabʼelebʼaal chʼiichʼ, bʼar tatbʼeeq, jarubʼ li naʼaj taachap ut junaq chik li naʼlebʼ.

LI NEKEʼRAJ KʼANJELAK. Wi nakaawaj xyeechiʼinkil aawibʼ re kʼanjelak saʼ li nimla chʼutam, aatinan chaq rikʼinebʼ li xaqabʼanbʼilebʼ re kʼehok esil ut kʼanjelak.

LI XSACHK CHIQU. Chixjunil li ttawmanq chi tzʼeqtzʼo tento xkanabʼankil chaq saʼ li naʼaj li nakʼulank re. Wi xaasachk kʼaru aawe, sikʼ chaq saʼ li naʼaj aʼin. Aran ajwiʼ, teʼkʼameʼq li kokʼal li xeʼsachk. Ut, re naq inkʼaʼ tqakʼe xnimal qakʼaʼuxl, us naq teeril leekokʼal ut wanqebʼ cheekʼatq junelik.

RE BʼANOK. Chiwanq saʼ laachʼool naq li naʼaj aʼin KAʼAJWIʼ choʼq re li AAJEL RU.