SUKULU WA BASAPWISHI BA BUFUMU Basapwishi babatizhiwa baji na myaka ya kusemwa kutendekela pa 23 kufika pa 65 bakeba kwingilako pakatampe mu mwingilo wa Lesa bafwainwa kutaanwako ku kusambakana kwa bakeba kuya ku Sukulu wa Basapwishi ba Bufumu kukekalako pa juba ja busatu lukelo. Bakabijika mpunzha kwa kusambakena ne kimye.

BAASHA Baasha bebapa mwingilo wa kwimukwasha. Onkao mambo, umvwinai byo babena kwimubuula kwa kwimikila myotoka, makinga, kwa kutwelela ne kwa kulupukila, pa kwikala, ne bintutu bikwabo.

LUBATIZHILO Bipona byo balamina babena kuya na kubatizhiwa bikekela kulutwe kwipi na mutuntamo. Babena kuya na kubatizhiwa bafwainwa kwikela jimo pa bino bipona jashi ja lubatizhilo saka jikyangye kutendeka pa juba ja Bubiji lukelo. Bonse babena kubatizhiwa bafwainwa kwiya na taulo ne bya kuvwala bya mushingi bya kuvwala pa kubatizhiwa.

BUPE Pataiwa mali avula bingi pa kuba’mba tunengezhe mpunzha yabaya bulongo pa kwikala, bya kwambilamo, biñambañamba bya mavidyo, ne mingilotu ikwabo yavula ilengela kushonkena kuwama ne kwitukwasha kufwenya kwipi ne Yehoba. Bupe bo mupana bukwasha kunengezha bino bintu ne kukwasha mwingilo wa ntanda yonse. Pa kuba’mba kimupeleleko, tubilambwilo twa bupe to banembapo betubika pa mapunzha avula pa kuno kushonkena. Tusanta bingi pa bupe bwenu bonse bo mupana. Jibumba Jitangijila jimusanchila bingi pa bumpanyi bwenu bwa kukwasha mwingilo wa Bufumu.

BUKWASHO BWA BUKIJI BUKIJI Yukai’mba luno lunengezho lwa lwaikelako kwitukwasha ku BINTU BITUFIKILA KYA KUBAZHIMUKILATU.

DIPATIMENTI WA BYELEKA Bipe byonse byaeleka byo mwataana mwafwainwa kwibitwala ku Dipatimenti wa Byeleka. Umvwe mwaelapo kintu kimo, yai ku uno dipatimenti ne kwipuzha kyokyo kintu kyo mwaela. Baana balubilamo babula kumona paikela bansemi babo, mwafwainwa kwibatwala ku uno dipatimenti. Pano bino, kechi mwafwainwa kumona uno dipatimenti nobe mpunzha kwa kulamina baana ne. Mwafwainwa kulama bulongo baana benu ne kwikala nabo.

PA KWIKALA Mwafwainwa kulangulukilangako bakwenu. Bantu bo mwafwainwatu kulamina bipona ke boba bo mwaiya nabo mu motoka umo, bo mwikala nabo pa nzubo nangwa bo mufunjisha Baibolo. Kechi mwafwainwa kubika bintu pa bipona po musakubula kwikala ne.

DIPATIMENTI WA MWINGILO WA KWIPANA Umvwe mukeba kwingilako mingilo pa kushonkena, yai ku Dipatimenti Utala pa Mabulañano ne Mwingilo wa Kwipana.