OSIKOLA YAAUVITHI YUUKWANIILWA Aakokolindjila mboka ye li pokati komimvo 23 no 65 mboka ye na ehalo lyokutamununa mo uukalele wawo otaya hiywa ya ka gongale pokugongala kwaamboka ya hala okuya kOsikola yaauvithi yUukwaniilwa mOsoondaha omutenya. Ehala nethimbo lyokugongala huka otali ka tseyithwa.

AAYAKULI Aayakuli oya tulwa po, opo ye ku kwathele. Alikana longela kumwe nayo mokulandula omalombwelo gawo kombinga yoopaakinga, yomukalo moka aantu ye na okweenda ngele pwa holoka oshiponga, yokuyalekela yalwe iipundi niinima yilwe.

ENINGINITHO Iipundi yaaninginithwa otayi ka kala yi li komeho lela, ihe ngele opwa ningwa omalunduluko gasha otashi ka tseyithwa. Mboka taya ka ninginithwa naya kuutumbe kiipundi mbyoka manga oshipopiwa sheninginitho inaashi tameka mOlyomakaya ongula. Kehe gumwe ne etelele oshihanduke noonguwo ndhoka tadhi opalele okuninginithwa.

OMAYAMBIDHIDHO Osha pula oshimaliwa oshindji, opo ku ningwe omalongekidho iipundi yi kale ya gwana, omambako, omashina gokuulika uuvidio nosho wo iikwaniipangitho yilwe oyindji mbyoka tayi ningitha oshigongi shetu shi kale oshiwanawa notashi tu kwathele tu hedhe popepyeelela naJehova. Omayambidhidho geni gehalo ewanawa otaga ka kwathela mokufuta iinima mbyoka notaga ka ambidhidha iilonga yokuuvitha muuyuni awuhe. MOshinyanga shika omu na uuketha womayambidhidho wa ndhindhilikwa nawa. Omayambidhidho geni otaga pandulwa noonkondo. Olutuwiliki olwa hala oku mu pandula omolwomayambidhidho geni gehalo ewanawa ngoka hamu gandja, opo mu humithe komeho iinima yUukwaniilwa.

EKWATHO LYOTANGO Ekwatho ndika otali pewa owala mboka ya pumbwa EKWATHO LYOPAULUMOMPUMBWE.

EHALA LYIINIMA YA TOOLWA Iinima ayihe mbyoka ya toolwa nayi falwe koshikondo shika. Ngele owa kanitha sha, inda koshikondo shika e to popi shoka wa kanitha. Aanona mboka ya kana notaya kongo aavali yawo, oye na okufalwa koshikondo shika. Ihe opo tu yande omaupyakadhi inaaga pumbiwa, otamu indilwa mu tonatele aanona yeni nomu kale mu li nayo aluhe.

IIPUNDI Dhiladhileni yakweni. Dhimbulukweni kutya otamu vulu owala okuyalekela yaandjeni iipundi naamboka mwe enda nayo moohauto yimwe, nenge hamu zi nayo megumbo lyeni nenge mboka hamu konakona nayo Ombiimbeli. Otamu indilwa kaamu tule iinima kiipundi ngele inamu yi yalekela omuntu.

IILONGA YOKWIIYAMBA Ngele owa hala okwaambidhidha iilonga yi na ko nasha nomalongekidho goshigongi, inda kOshikondo shUuyelele nIilonga yOkwiiyamba.