Tati Kiñewkülechi Ngünenielu ñi karta
‘Feley eymün tamün kimeltuchefengeal’ (Eb. 5:12). ¡Feley llemay! Jewba fey tati doy küme Kimeltuchefe ñi mülen. Fey mangelkeeiñmew taiñ kimeltucheal kidu mu. Kimeltucheal familia mu, ti trawünche kam amuldungun mew, kom tüfa kiñe falin küdaw taiñ elfalkünuletew Jewba. Feymu, ¿chumafuiñ taiñ küme kimeltucheal?
Apostol Pablo feypieiñmu taiñ chumal. Ngüneduamnge chem ñi wirintukulelfiel ta Timotew: “Newentulenge tami chillkatuafiel ti trawün che mew tati Wirin Chillka, tami yafültukuafiel ka tami kimeltuafiel tati pu peñi ka lamngen engün”. Fey ka feypi: “Femülmi, kisutu ta montuluwaymi ka femngechi montuay tüfey engün tami allkütukeetewchi pu che” (1 Tim. 4:13, 16). Ti werkün dungu tami kimeltukeel montulchekey. Feymu fente falin-ngey tami yafüluwal, femngechi tami doy küme papeltual ka kimeltucheal. Tüfachi wirin chillka kelluaeymu tami femal tüfa. Inaduamaiñ kiñeke dungu ñi nieel:
Kom kimeltun mew wirikonküley kiñe texto. Tüfa nüwküley feychi kimeltun mu ka pengelafuy chumngechi kiñeke che kuyfi mu inafingün tüfa.
Jewba fey tati doy fütra Kimeltuchefe (Is. 30:20). Tüfachi wirin chillka kelluaeymu tami adümuwal, femngechi tami doy küme papeltual ka kimeltucheal. Welu longkontukunge, Jewba mew küpay taiñ kimeltukeel ka kidu püllentukupakefi pu che tañi trokiñche mu (Juan 6:44). Feymu llemay, llellipufinge ta Jewba tami eluaetew ñi newen. Eluwkülenge tami kimeltucheal Biblia mu. Feypilayaymi eymi tami rakiduam, doy may kelluafimi pu che tañi kimal chem rakiduamkey Jewba. Yafüluwnge kelluafiel tami pu allkütukeetew, femngechi ñi doy piwkeyeafiel engün ta Chaw Ngünechen.
Chaw Dios mangeleymu tami wülal kiñe falin werkün dungu. Ngelay doy falin-ngechi dungu ñi wülngeal. Maneluwülmi “Ngünechen tañi elukeetewchi newen mew”, küme tripayay tami küdaw (1 Ped. 4:11).
Tamün pu chaf kimeltuchefe,
Tati Kiñewkülechi Ngünenielu pu Dungukelu Iney Ngen Jewba mew
