Lɛtri nga e Anuannzɛ’n i ɲrun dinfuɛ’m be klɛli’n
“Ɔ fata kɛ amun kle amun wiengu’m be like.” (Ebr. 5:12) Sran’m be like klelɛ nun’n sran fi toman Zoova. Sanngɛ ɔ fa e kɛ e kle e wiengu’m be like. Blɛ kwlaa nga e kan Zoova i su ndɛ’n, i sɔ’n ti junman nanndoliɛ, yɛ ɔ ti e cenjele like dan. Ɔ kwla yo awlo lɔ, annzɛ asɔnun’n nun, annzɛ kusu jasin fɛ bolɛ’n nun. ?É yó sɛ naan y’a kwla di junman sɔ’n i kpa?
Ndɛ nga akoto Pɔlu kan kleli Timote’n, ɔ kwla uka e kpa. Ɔ seli i kɛ: “Mian ɔ ɲin kanngan fluwa nun nzra nun titi, man sran’m be afɔtuɛ titi, yɛ kle sran’m be like titi.” Ɔ kan guali su ekun kɛ: “Sɛ a yo sɔ’n, á dé ɔ bɔbɔ ɔ wun, yɛ á dé be nga be ti ɔ ndɛ’n.” (1 Tim. 4:13, 16) Ndɛ nga a kan’n, ɔ kwla man sran nguan. I sɔ’n ti’n, ɔ ti cinnjin kɛ a mian ɔ ɲin naan a si kanngan, yɛ a si like kle kpa tra laa’n. Fluwa pɛplɛpɛ nga ɔ́ wá úka wɔ naan w’a kwla yo sɔ. Maan e fa e ɲin e sie i i nun ninnge wie’m be su e nian.
Fluwa’n i bue kwlaa su’n, be klɛ Biblu’n nun ndɛ mma kun. Afɔtuɛ nga be man’n, ɔ taka Biblu’n nun ndɛ mma sɔ’n su. Annzɛ Biblu’n nun ndɛ mma’n ɔ kle wafa nga be kwla nanti afɔtuɛ nga be man’n su.
‘?Wan yɛ ɔ si like kle kɛ Zoova sa-ɔ?’ (Zɔb 36:22) Fluwa nga wá úka wɔ naan w’a si kanngan kpa, naan kusu w’a si like kle. Sanngɛ nán ɔ wla fi su kɛ ndɛ nga e kan’n ɔ fin Zoova. I bɔbɔ yɛ maan sran’m be bɛ i sulɛ-ɔ. (Zan 6:44) Ɔ maan srɛ Zoova titi kɛ ɔ fɛ i wawɛ’n man wɔ. Fa Ɲanmiɛn Ndɛ’n di junman titi. Fa sran’m be ɲin sie i Zoova su, nán kunndɛ dunman. Uka be nga a kle be like’n naan be klo Zoova.
Jasin nga Ɲanmiɛn seli e kɛ e bo’n yɛ ɔ ti jasin cinnjin kpafuɛ’n niɔn. E lafi su kpa kɛ sɛ a fa ɔ wla gua “wunmiɛn nga Ɲanmiɛn man’n su’n” á kwlá dí junman sɔ’n i kpa.—1 Piɛli 4:11.
E nin amun yɛ e di junman’n niɔn,
Zoova i Lalofuɛ’m be anuannzɛ’n i Ɲrun dinfuɛ mun
