‘Dapat na magin mga paratukdo kamo.’ (Heb. 5:12) Isip-isipa iyan! Si Jehova—an pinakamahusay na Paratukdo sa uniberso—inaagda kita na tukduan an iba manungod sa saiya! An ano man na asignasyon na magtukdo kan katotoohan manungod ki Jehova—sa pamilya man iyan, sa kongregasyon, o sa ministeryo—sarong mahalagang marhay na pribilehiyo asin magabat na responsabilidad. Paano ta iyan magigibo?

An simbag yaon sa mga tataramon ni apostol Pablo sa surat niya ki Timoteo: “Padagos kang magpokus sa ginigibo mong pagbasa sa atubangan nin mga tawo, sa pagsadol, asin sa pagtutukdo.” Sinabi pa ni Pablo: “Sa paggibo mo kaini maililigtas mo an saimong sadiri pati na idtong mga nagdadangog sa saimo.” (1 Tim. 4:13, 16) Nagliligtas-buhay an mensaheng dara mo. Kaya importanteng marhay na maghinguwa kang magin mahusay sa pagbasa asin sa pagtukdo. Ginibo an brosyur na ini tanganing tabangan kang magibo iyan. Uni an pira sa mga interesanteng mahihiling digdi.

Si Jehova an “Kahuruhalangkawing Instruktor.” (Isa. 30:20, NW) Maski ngani an brosyur na ini makakatabang sa saimo na magin mas mahusay na parabasa asin paratukdo, dai paglingawan na hali ki Jehova an satong mensahe asin na siya an nagpaparani sa mga tawo pasiring sa katotoohan. (Juan 6:44) Kaya pirming hagadon sa pamibi an tabang kan banal na espiritu. Parating gamiton an Tataramon nin Diyos. Darahon an atensiyon ki Jehova, bako sa saimong sadiri. Hinguwahon na tabangan an mga nagdadangog na magkaigwa nin hararom na pagkamuot sa saiya.

Inagda ka na magtukdo kan pinakamahalagang mensahe na ipinapaabot sa mga tawo. Nagtitiwala kami na mantang nagsasarig ka “sa kusog na itinatao nin Diyos,” magigibo mo iyan.—1 Ped. 4:11.

An saimong mga kapwa paratukdo,

Namamahalang Grupo kan Mga Saksi ni Jehova