“Naoia i stret blong yufala i tijim ol narafala.” (Hib. 5:12) !Traem tingbaot! Jehova, we i Nambawan Tija long heven mo wol, i askem long yumi blong yumi tijim ol narafala long saed blong hem! Wok ya i wan nambawan blesing, mo i wan bigfala wok tu, nating se long famle, long kongregesen, o long wok blong prij. ?Olsem wanem blong mekem gud wok ya?

Aposol Pol i ansarem kwestin ya taem hem i raetem leta long Timoti, i se: “Yu mas gohed blong mekem bes blong yu long wok ya blong ridim Baebol long ol man, mo blong givim advaes long ol man, mo blong tijim olgeta.” Pol i gohed se: “Sipos yu mekem olsem, bambae yu sevem yu, wetem olgeta we oli lesin long yu.” (1 Tim. 4:13, 16) Ol tok we yu talemaot i save sevem laef blong ol man. Taswe yu mas wokhad blong kamgud long fasin blong rid mo tijim ol man. Buklet ya i blong givhan long yu blong mekem olsem. Tingbaot sam samting we i stap long buklet ya:

Jehova ‘i stap klosap long yumi blong tijim yumi.’ (Aes. 30:20) Buklet ya bambae i givhan long yu blong yu kamgud moa blong rid mo tij, be yu no mas fogetem se Jehova i Stamba blong ol tok we yumi talemaot, mo hem nao i pulum ol man. (Jon 6:44) Taswe, yu mas prea oltaem blong kasem tabu spirit. Yusum Tok blong God oltaem. Pulum ol man oli go long Jehova, be i no long yu. Traehad blong halpem olgeta blong oli lavem Jehova wetem fulhat blong olgeta.

Jehova i givim ol tok long yumi we i moa impoten i bitim eni tok we hem i givim long ol man bifo, mo i wantem se yu tijim ol man long ol tok ya. Mifala i sua se sipos yu dipen “long paoa we God i givim,” bambae yu mekem gud wok ya.—1 Pita 4:11.

Ol brata we oli joen wetem yu blong mekem wok blong God,

Hed Kampani Blong Ol Witnes Blong Jehova