“Uwa gha re emamwaemwi.” (Hib 5:12) U miẹn ukpamuyọmọ ne ọna khin! E Jehova—nọ re ọmamwaemwi nọ sẹ ehia vbe agbọn kevbe ẹrinmwi, gie na tie ima, ne ima ya maa emwa emwi vbekpae irẹn! Iwinna ke iwinna nọ ghi dekaan na maa emwa emwi vbekpa ẹmwata ọghe Jehova, ọre vbuwe ẹgbẹe nọ ra vbuwe iko ra vbe ikporhu, keghi re emwi ne kpataki nọ bi ye ima izabọ. Vbọ khian ru iyobọ ne ima, ne ima sẹtin musọe?

Ma gha miẹn ewanniẹn ọghe inọta na vbe ebe ne ukọ e Pọl gbẹn gie Timoti ne ọ na kha wẹẹ: “Kakabọ rhie ẹghẹ ne u muegbe ye ẹmwẹ ebe na tie ma emwa vbene I te rre kẹ kevbe orhu na kpe kevbe emwi na ma emwa re.” E Pọl na vbe rhie tẹ wẹẹ: “U gha ru vberriọ u gha miẹn egbe ruẹ kevbe iran ni danmwehọ ruẹ fan.” (1 Tim 4:13, 16) Uhunmwu na gie ruẹ re na, keghi re nọ gha miẹn emwa fan. Rhunmwuda ọni, ọ keghi re emwi ne kpataki ne u gha mwẹ alaghodaro vbe odẹ ne u ya tie ebe kevbe odẹ ne u ya maa emwa emwi. A keghi gbẹn ebe ẹmu na, na ya ru iyobọ nuẹn, ne u mieke na sẹtin ru iwinna na ẹse. Gia ziro yan abọ ughughan ọghe ebe na.

E Jehova ọre “ọmamwaemwi nọ ghi kpọlọ sẹ vbe ehia.” (Job 36:22) Ebe na gha ru iyobọ nuẹ ya guẹ sayọ vbe odẹ ne u ya tie ebe kevbe odẹ ne u ya maa emwa emwi, sokpan ghẹ mianmian wẹẹ e Jehova ẹre ọ gie ima uhunmwu kevbe wẹẹ, irẹn ẹre ọ si emwa la iko ọghẹe. (Jọn 6:44) Rhunmwuda ọni, gha na erhunmwu vbe ẹghẹ hia ne Osanobua ya orhiọn nọhuanrẹn ọghẹe ru iyobọ nuẹn. Gha loo Evbagbẹn Nọhuanrẹn vbe ẹghẹ hia. Gi emwa rẹn wẹẹ ẹmwẹ e Jehova ẹre u ta ighẹ ẹi re ẹmwẹ obọ ruẹ. Ta ẹmwẹ nọ gha ya emwa ni danmwehọ ruẹ gha mwẹ ahoẹmwọmwa nọ dinmwi daa Osanobua.

Uhunmwu nọ ghi ru ekpataki sẹ, ẹre Osanobua gie ruẹ ẹre ne u ya tama emwa. Ma mwẹ ọnrẹn vbe ilẹkẹtin wẹẹ deghẹ u na hẹnhẹn egbe yan ‘ẹtin nọ ke obọ Osanobua rre,’ u gha musọe.—1 Pit 4:11.

Etẹn uwa ne uwa gba ga,

Ẹbu Nọ Su Ọghe Avbe Osẹe Jehova