“Mi ayiane bo beye’ele.” (Beh. 5:12) Wo wô’ôtan aya éyoñe wo wô’ô na, Yéhôva, Ñye’ele a dañe beye’ele bese a ve bia mbe’e ya ye’ele bôte bevok Mejô mé? Beta mbe’e nga? E ye’ele bôte Mejô me Yéhôva a ne beta ésaé, to’o wo bo de nda bôte jôé été, akônda été, nge ke nkañete. Jé é ne volô bia na bi bo de avale da yian?

Kalate Paul a nga lôme Timothée a yalane nsili ôte: ‘Va’a nleme wôé ôse nlañane Mintilan, nlebane bôt a ñye’elan.’ A nga jô fe nye na: ‘Vôm wo bo nalé, wo ye nyii womien, a ba be awô’ô wo, mia bebaane.’ (1 Tim. 4:13, 16) Ô bili foé é ne nyii bôt. Ajô te nde, wo yiane ve ngule ya bo atyeñ éyoñe wo lañ a ye’ele bôte Mejô me Zambe. Nsoé kalate wu wo ye volô wo. Tame yene mame me ne été.

Yéhôva a ne ‘Beta Ñye’ele.’ (És. 30:20) Nsoé kalate wu wo volô fo’o wo na, ô bo atyeñ éyoñe wo lañ a ye’ele bôt, ve te vuane na Yéhôva nnye a ne Anjeñe ya foé bia kate bôt, a na a belane foé éte na a tôkane bôt. (Jn 6:44) Nde ñhe, ye’elane nye, sili’i nye mbamba nsisime wé. Bela’ane Kalate Zambe nya mbelane. Éyoñe wo ye’ele bôt, bo’o na be ve Yéhôva duma, sa ke wo. Jeñe’ a ngul ése na bôte ba vô’ôlô wo be tu’a nye’e Yéhôva.

Yéhôva a tobeya wo na, ô kate foé ja dañe mefoé mese bôte be ne kat. Bi too ndi na, ngul ése wo ve na ô belane “ngule Zambe a ve” nya mbelane, ja ye wume bibuma.​—1 P. 4:11.

Bia bo ésaé ya ye’ele bôt nsamba a wo,

Tin Ékôan Bengaa be Yéhôva