Zot devret “vin bann ansenyan.” (Ebr. 5:12) Zis mazinen! Zeova, sa pli bon Ansenyan dan liniver, pe envit nou pour ansenny lezot konsernan li! Nenport ki privilez ki nou gannyen pour ansenny laverite lo Zeova i presye e i en gran responsabilite, ki swa dan fanmir, kongregasyon oubyen dan predikasyon. Ki mannyer nou kapab reisi fer sa?

Larepons i ganny trouve dan sa ki zapot Pol ti ekri Timote: “Kontinyen donn ou meyer ler ou lir an piblik, donn konsey e ansennyen.” Apre Pol ti azoute: “Si ou fer sa, ou pou sov ou prop lekor ek sa bann ki ekout ou.” (1 Tim. 4:13, 16) Ou pe anons en mesaz ki kapab sov lavi bann dimoun. Alor, i enportan ki ou fer zefor pour amelyor ou fason lir e ansennyen. Sa liv in ganny prepare pour ed ou fer sanmenm. Annou get serten laspe sa liv:

Zeova i sa Enn ki pe ansenny ou. (Iza. 30:20) Menm si sa liv pou ed ou amelyor ou abilite pour lir e ansennyen, pa zanmen bliye ki sa mesaz i sorti kot Zeova e se Zeova ki atir dimoun ver li. (Zan 6:44) Alor, toultan priye pour ganny lespri sen. Toultan servi Parol Bondye. Ler ou pe ansennyen, atir latansyon lo Zeova pa lo ou prop lekor. Fer en kantite zefor pour ed sa dimoun ki pe ekout ou devlop en gran lanmour pour Zeova.

Ou’n ganny envite pour vin en ansenyan ki anons sa mesaz pli enportan lo later. Nou konfidan ki anmezir ki ou depan “lo lafors ki Bondye i donnen,” ou pou reisi.​—1 Pyer 4:11.

Zot bann frer ki ini avek zot dan sa travay lansennyman,

Konsey Direkter Temwen Zeova