“Langame̱ne̱ be̱ balēdi.” (Bon. 5:12) Dutea te̱ ná Yehova, Mulēdi Nupeti o mo̱ń na o wase, a mabaise̱ biso̱ ná di lee̱ bane̱ nja eno̱! E be̱ oteten a mbia, oboso ba mwemba, to̱ o dikalo, lee̱ mbale̱ ońola Yehova le nde eto̱ti ye tiki n’ebol’a mweńa. Ne̱ni jeno̱ ná di tongwe̱le̱ o bola nika e?

Jalabe̱ di maso̱be̱ o byala ńamuloloma Paulo a tiledino̱ Timoteo: “Tingame̱ o langa na jome̱le̱ na lee̱.” Paulo a bati pe̱ ná: “O mabola te̱ nika, ke̱ o me̱nde̱ jongise̱ wame̱ne̱ na ba pe̱ ba masengane̱ wa.” (1 Tim. 4:13, 16) Wangame̱n langwa mwe̱ndi mu masunge̱ bato. Ye so̱ mweńa ná o bole me̱se̱ ná o po̱ngulane̱ bolanga bo̱ngo̱ na mbad’ango̱ ńa lee̱. Nin kalati e tilabe̱ nde o jongwane̱ wa ońola nika. Ngus’a mambo man me oten:

Yehova nde e “Mulēdi Ńasam.” (Yes. 30:20, NW) O ponda nin kalati ńeno̱ o jangwe̱le̱ wa ka mulangedi na mulēd’a bwam, o si dimbea ná mwe̱ndi di malangwano̱ mu mawa nde na Yehova mo̱ pe̱ nde a madute̱ bato. (Yoh 6:44) Ońola nika so̱, kane̱ mo̱ ponda ye̱se̱ ná a bole wa mudī musangi. Bolane̱ Bibe̱l ponda ye̱se̱. Bola ná bato be̱ne̱ nde Yehova, seto̱ wa. Keka na ngińa ná o de̱ ndol’a mbale̱ ońola Yehova o milema ma basengedi bo̱ngo̱.

O kusi eto̱t’a lee̱ bato mwe̱ndi ma mweńa mot’a benama a si tano̱ a mákusa. Kana o mabolano̱ nde “bupane̱ ngińa ńena Loba a mabolano̱,” je mbaki ná o me̱nde̱ tongwe̱le̱.​—1 Pet. 4:11.

Mako̱m mo̱ngo̱ m’ebol’a belēdi,

Dibe̱le̱ di Madie̱le̱ la Mboṅ a Yehova