‘Aw ka kan ka kɛ tɔɔw kalanbagaw ye.’ (Eburuw 5:12). Miiri k’a filɛ: Jehova ye Karamɔgɔba ye min ɲɔgɔn tɛ yen duniɲa kuru bɛɛ kɔnɔ, ani a ko an ka mɔgɔw kalan ale koo la! A mana kɛ denbaya kɔnɔ, lajɛnw na wala waajuli baara la, Jehova ye baara min bɛɛ kalifa an ma ko an ka mɔgɔw kalan walisa u ka tiɲɛn lɔn ale koo la, o ye nɛɛma ani kunkanbaaraba yɛrɛ lo ye. Mun lo bena an dɛmɛ ka se k’o cii dafa?

O jaabili be sɔrɔ ciden Pol ka kuma nunu na, a ye minw fɔ Timote ye. A ko: “Jija ka Ala ka kuma fɔ jama cɛma, k’u waaju, k’u kalan fana.” A y’a fɔ fana ko: “N’o kɛra, i bena i yɛrɛ kisi ani k’i lamɛnbagaw fana kisi.” (1 Tim. 4:13, 16). Baara min kalifara i ma, o be mɔgɔ niin kisi. O lo kama, a kɔrɔtanin lo kosɔbɛ i k’i jija k’i ka kalangwɛ kɛcogo ni mɔgɔw kalancogo fisaya. Kitabunin nin kuun ye k’i dɛmɛ k’o lo kɛ. A kɔnɔnako damanin filɛ nin ye.

Jehova ye an “kalanbaga” ye min ɲɔgɔn tɛ yen (Ezayi 30:20). Kitabunin nin bena i dɛmɛ k’i ka kalangwɛ kɛcogo ni mɔgɔw kalancogo fisaya. Nka, kana ɲinɛ abada ko an ka kalan be bɔ Jehova lo yɔrɔ ani ko ale lo be mɔgɔw sama a ma (Zan 6:44). O kama, Jehova deli tuma o tuma a ka hakili senu d’i ma. Baara kɛ ni Ala ka Kuma ye tuma bɛɛ. Kana mɔgɔw ɲɛsin ele yɛrɛ ma, nka u ɲɛsin Jehova ma. I jija k’i lamɛnbagaw dɛmɛ u ka Jehova kanu kosɔbɛ.

Jehova b’a ɲini i fɛ i ka mɔgɔw kalan kibaro dɔ la min kɔrɔtanin lo kosɔbɛ. O baara ɲɔgɔn ma deli ka kalifa adamadenw ma ka ye. An lanin b’a la ko i bena se k’o cii dafa “Ala ka barika” sababu la.—1 Piyɛri 4:11.

I baarakɛɲɔgɔnw,

Jehova Seerew ka Koow Ɲɛnabɔla Jɛnkulu