« Zò té dwèt ja ka anségné » (Ébr. 5:12). Ou ka rann-vou kont : Jéova, pli bon Anségnan ki ni adan linivè, ka envité-nou anségné lézòt kimoun i yé ! Anségné lavérité asi Jéova, ki sé adan fanmi-la, adan lasanblé-la oben adan ministè-la, sé on lonnè èstraòwdinè é on rèsponsabilité ki vréman enpòwtan. Kijan nou pé rivé fè sa ?

Nou ka touvé répons-la adan sa lapòt Pòl maké ba Timoté : « Kontinyé apliké-w lè ou ka li an piblik, lè ou ka ankourajé é lè ou ka anségné. » Pòl di osi : « Lè ou ké fè sa ou ké sové ki voumenm ki séla ki ka kouté-w la » (1 Tim. 4:13, 16). Mésaj-la nou ka pòté la ka sové moun. Sé pousa sa vréman enpòwtan kè chakmoun fè éfò pou li é pou anségné plibyen. Bwochi-lasa fèt pou édé-w fè sa. An-nou vwè kijan :

Jéova sé « Gran Pwofésè »-la (Iz. 30:20). Menmsi bwochi-lasa ka édé-w li é anségné plibyen, pa jen oubliyé kè mésaj-la nou ka pòté la ka vin dè Jéova é kè sé li ki ka atiré sé moun-la (Jan 6:44). Alò, toujou priyé-y pou mandé-y lèspri sen a-y. Sèvi onlo èvè Pawòl a-y. Toujou mèt lidé a Jéova douvan, plito ki lidé a-w. Fè éfò pou édé moun ki ka kouté-w enmé Jéova èvè tout tchè a yo.

Ou ni on bèl privilèj : anségné mésaj-la ki pi enpòwtan la kè pon nonm po’o jen pòté avan. Nou sèten kè si ou konté « asi fòs-la Bondyé ka bay la », ou ké rivé (1 Pyè 4:11).

Frè a-w ki ka travay ansanm-ansanm èvè-w,

Komité santral a Témwen a Jéova