Tumi “xikovnn diunk purtim zaunk” zai. (Heb. 5:12) Chintun polloiat! Akʼkhea vixvantlo sogleam poros vorto Xikxok, Jehova, amkam apovnnem dita, dusreank tachea vixim xikounk! Jehova vixim dusreank xikovop mhunnttlear—zaum tem kuttumbant, sobhent, vo porgottnnechea kamant—khorench amkam ek vhodd sueog ani zobabdari zaun asa. Hea kamant amkam ies koso mellttolo?

Hachi zap amkam apostl Paulun Timotak boroilolea chittint melltta. Paulu boroita: “Sobhek Povitr Pustok vachunk, updesunk ani xikovnn diunk lokx di.” Fuddem Paulu mhunntta: “Oxem korun, tuji ani tujem utor aikotoleanchi soddvonn tum zoddtoloi.” (1 Tim. 4:13, 16) Tum dita to sondex aikon dusreancho jiv salvar zaunk xokta. Tor tuji vachpachi ani xikoupachi kola sudharop mhotvachem zaun asa. Hi pustika tuji kola vaddounk tuka adar kortoli. He pustikechem khaxelponn polloiat.

Jehova Vorto “Guruji” zaun asa. (Iz. 30:20) Hea pustikechea adaran, vachpachi ani xikoupachi kola vaddounk tumkam modot zatoli hatunt dubhav na. Punn, tumi ugddas dovrunk zai, ki amcho sondex Jehova Deva thaun ieta, ani Toch lokank apleaxim oddun haddtta. (Juanv 6:44) Dekhun, porot-porot magnnem korun povitr xokti magat. Devachea Utracho boro upeog korat. Lokanchem dhean tumcher nhoi punn Jehovacher haddat. Tumchea aiknnareanchea kallzan Jehova pasot khol mog utpon korunk proitn korat.

Munxank sogleant mhotvacho sondex porgott korunk Devan tumkam apovnnem dilam. Amkam khatri asa ki ‘Dev dita ti ghottai’ gheun tumkam ies melltoloch.—1 Ped. 4:11.

Tumchea sangata xikoupi,

Jehovachea Sakxeanchem Sonchalon Monddoll