Anashii jikirajüliire (Heb. 5:12, TNM). Jehová chi atüjakai maʼin ekirajaa naʼakajee na ekirajüliikana, nüneeküin waya süpüla wekirajüin wayuu nüchiki. Anasü maʼin süka wekirajüin nüchiki Jehová na wapüshikana, na wawalayuukana jee müshiʼiya na wayuukana. Kojutusü maʼin wamüin tia aʼyatawaakat. ¿Kasa waaʼinrajatka süpüla anain shia watuma?

Süpüla anain shia, jülüja waaʼin nünüiki Pablo nümüin Timoteo wanaa sümaa nümüin: «Ayataʼaya pia sünain paashajeʼerüin pütchi suʼupala wayuu, ayataʼaya pia sünain achiawaa jee sünain ekirajaa». Anuu sooʼomüin nünüiki Pablo: «Müle sukuwaʼipa putuma oʼttaajeechi pia jee oʼttaajeenaʼaya na aapajakana pünüiki» (1 Tim. 4:13, 16, TNM). Eʼitaanüsü pajapuluʼu piʼikajaainjachin pütchi katüinjatka atuma soʼu wayuu. Müshijeseʼe pütüjainjachin maʼin aashajeʼeraa otta ekirajaa. Akumajuushi karaloʼutakat tüü süpüla pütüjain süpüleerua tia. Anuu waneirua kasa eʼitaanaka suluʼu:

Nia Jehová chi Shikiishikai tü Ekirajawaakat (Isa. 30:20). Karaloʼutakat tüü süküjain pümüin tü paaʼinrajatkat süpüla pütüjain maʼin aashajeʼeraa otta ekirajaa. Nnojo motuin paaʼin niain Jehová kanüikin tü pütchi wekirajakalü otta nia arütkeʼeraka wayuu nünainmüin (Juan 6:44). Puchunta nümüin waneepia Jehová tü nüpülainkat. Pikiraja waneepia süka tü Nünüikikat. Pikirajapa, niainjachi aʼwaajünaka Maleiwa sükajee pünüiki, nnojoishi piainjachin. Piʼyataa süchiirua makatüinjatüin suluʼu naaʼin na wayuukana alinjachin maʼin Jehová napüla.

Aneekünüshi pia süpüla pikirajüin tü pütchi alanaʼaleekat suluʼu anain saʼakajee tü pütchi saapüitkat wayuu. Weʼitaain waaʼin sünain aneerüin sukuwaʼipa putuma puuʼulaale nükaaliijain pia Maleiwa sükajee tü nüpülainkat (1 Ped. 4:11, TNM).

Na ekirajüliikana wanaa pümaa,

Laülaashii Jülüjakana Aaʼin na Aküjaliikana Pütchi