‘Aʋ ˈye ɲʋndhɛtɔɔʋn -nɩn.’ (Ebl. 5:12) -Naan -tɔˈ i ke aˈ! Zoova nɩan ɲʋndhɛtɔɔin- -klaaˈˈ ˈnɔn ˈkmʋn ɛn, ɔɔ dhbho -aʋ ˈmɛn -a -ˈye ɔɔˈ dɩ ˈtmʋn ˈdhe ɲʋn bho. -Bho -aa sa ɲʋn -tɔˈdɩ ˈtmʋʋn ˈdhe Zoova aˈ dɩ ˈdhi ˈdhe ˈˈgbuzɔnˈ -e ˈdhe ɲɔnsoagbu ˈdhi -e ˈdhe -bobhlaaˈ aˈ, ɛ nɩn ˈˈɩnmɔɛn- -klaaˈˈ -e dhbho -klaaˈˈ -a ˈbhle. ˈKlaa -kawɛ- -a -ˈye nʋn -wɛeˈ -a -ˈye dhbho -ˈnɔn nʋn -kajɔɔnka -a?

Ideedɩ- -ˈnɩn anˈ ˈdhezaaˈ -nɩɛn- ˈe ˈsɛɛ- Pɔʋ ˈcrea ɔ kpa Timotee ˈdhi: ‘Kpʋn ˈe dhɩdhiizroɛ -e ɲʋnkpɩpoɛ -e ɲʋndhɛtɔɔɛn ˈˈjhri.’ ˈBho -ˈmɛn ˈdhe Pɔʋ ˈnaan: ‘-Bho -man sɛ nʋn ɛnˈ, -man muɛn -manˈ ˈˈjɛ -e ɲʋn -an poa ʋn -dheinˈˈ bho ˈpʋʋ-.’ (1 Tim. 4:13, 16) -ˈBhleɛ ɲʋn ˈpʋʋ- -bo -ˈye bhla. Ɛɛˈ dɩ -ˈye -manˈ dhɛdhiizrosʋn -e -manˈ ɲʋndhɛtɔɔnsʋn ˈkpa po. ˈSɛɛ- nɛn -nʋʋɛnˈ -wɛeˈ ɛ ˈye ʋn sʋn bho po ˈdhe ɛɛˈ dɩ ˈdhi. -A ˈtmʋn dhɩ aˈ ˈpla nɩan ˈe ɛ ˈdhi ɩanˈ dɩ.

Zoova -nɩɛn- “ɲʋndhɛtɔɔin- -klaaˈˈ.” (Isa. 30:20) -Bho ˈsɛɛ- nɛn ɛn sa ʋn sʋn bho po -wɛeˈ -manˈ dhɛdhiizrosʋn -e -manˈ ɲʋndhɛtɔɔnsʋn an sa ˈˈkpe ˈkpa aˈ, -manˈ ˈˈmaeˈ -dhe -ka -bo -aa bhla ˈghlʋa ˈe Zoova bho ˈˈdhe ɛ nɩn ɔmɔn- -ɔn jri ɲʋn ˈdhe ɔ bho ɛ. (Zan 6:44) Ɛɛˈ dɩ -ˈye Ɲɔnsoa bhae- ɔ ˈye ʋn ɔɔˈ -zuu ˈˈɲɩn. -Jhii Biiblʋ i jheejhee -bho -man sa bo bhla aˈ. -Manˈ ˈbɔn -manˈ ˈˈjɛ ɛˈ ˈɲnɩnghlʋɛ- i -dhe, ˈbɔn Zoova aˈ ˈɲnɩnghlʋɛ- i. Po ɲʋn -an poa -ʋn -dheinˈˈ bho ˈkpɩ ʋʋ ˈye Zoova aˈ dɩkman-.

-Bobhladhbho- -kɔandɩ ɲʋn ˈse anˈ -glɔɲiɔn kwa de -kpɔ -dhueˈ ɛ, ɔmɔn- ɲʋn de -ʋn kwa. -A deɛ -gwlɩˈˈ ˈmɛn -ka -ˈbhɛɛa -ˈyea dhbho -ˈnɔn nʋn ɛn, dhɛbhleɛ, deɛ “ˈkpɩ Ɲɔnsoa a ˈˈɲɩan ɲʋn” -gwlɩˈˈ.—1 Piɛ. 4:11.

-Manˈ ˈdhoudhi -ˈˈwe -nɩn -man tɔɔan ɲʋn dhɛ,

Zoova aˈ -Bobhlaʋn- anˈ -Glibha aˈ jebhopoʋn-