Eṋe mwa “yenena okurira ovahonge.” (Hebr. 5:12) Jehova, Omuhonge omusembasemba mouye auhe, me tu ṋanga okuhonga varwe ohunga na ye! Otjiungura atjihe tji twa pewa tjokuhonga ouatjiri ohunga na Jehova, meṱunḓu, mombongo, poo motjiungura tjokuzuvarisa, ondjingonekero yapeke nu omerizirira omazeu tjinene. Omomuano uṋe mu matu yenene okuungura otjiungura hi nondoṋeno?

Eziriro matu rimunu momambo womuapostele Paulus nga tjangere ku Timoteus, ngu maye tja: “Panḓera pokulesera ovandu Omatjangwa nokuzuvarisa nokuhonga.” Komurungu Paulus wa tja: “Orondu tji wa tjiti nai, indino mo riyama omuini na imba mbu mave puratene kove.” (1 Tim. 4:13, 16) Eṋe mu nombuze yondjamo ndji mamu sokuhaṋasana ku novandu. Okutja otjiṋa otjinanḓengu okuungura oukukutu kutja mu rire ovalese novahonge ovawa. Okambo nga kaungurirwa kutja ke yenene okumuvatera okutjita nao. Tara koviuṋe tjiva mbi ri mokambo nga.

Jehova “omuini ma kara mbo okukuhonga.” (Jes. 30:20) Ngunda okambo nga amake ku vatere okurira omulese nomuhonge omuwa, ngoo roro okuzemba kutja ombuze ndji u tjivisa i za ku Jehova, nokutja eye ongu nana ovandu. (Joh. 6:44) Kunao, aruhe ningira ombepo ondjapuke mongumbiro. Ungurisa Embo ra Mukuru aruhe. Nanena ombango yovandu ku Jehova, nu ka kove omuini. Kondja okuvatera ovapuratene voye okusuvera Jehova nomutima auhe.

Ove u nondjingonekero yokuhonga ombuze onanḓengu tjinene kovandu. Eṱe tu nongamburiro yokutja tji mo riyameke ‘komasa ngu mo pewa i Ndjambi,’ mo yenene okutoṋa.—1 Petr. 4:11.

Ovahonge ovakweṋu,

Orutu Orunane rwOvahongonone va Jehova