Surat ti Bagi a Manarawidwid
‘Agbalinkayo koma a mannursuro.’ (Heb. 5:12) Agasem! Aw-awisennatayo ni Jehova—ti kalaingan a Mannursuro iti uniberso—a mangisuro iti sabsabali iti kinapudno maipapan kenkuana! Nagpateg ken serioso a responsabilidad ti aniaman nga annongen a mangisuro iti kinapudno maipapan ken Jehova—iti man pamilia, kongregasion, wenno ministerio. Kasano nga agballigitayo a mangaramid iti dayta?
Masarakan ti sungbat iti imbaga ni apostol Pablo iti suratna ken Timoteo: “Itultuloymo nga ipamaysa ti panagbasa iti publiko, panangparegta, panangisuro.” Innayon ni Pablo: “No kasta ti aramidem, maisalakanmonto ti bagim ken dagiti dumngeg kenka.” (1 Tim. 4:13, 16) Adda makaisalakan a mensahe a nasken nga ipakaammom isu a nagpateg nga ikagumaam a pasayaaten ti panagbasa ken panangisurom. Naaramid daytoy a broshur tapno matulonganka a mangaramid iti dayta. Kitaem ti dadduma a feature-na.
Naisitar a teksto iti tunggal panid a mabalin a maysa a prinsipio ti Biblia a konektado iti maad-adal a punto wenno maysa a pagarigan ti punto a mailawlawag
Ni Jehova ti ‘Naindaklan nga Instruktor.’ (Isa. 30:20) Matulongannaka daytoy a broshur a mangasa iti abilidadmo nga agbasa ken mangisuro, ngem dimo liplipatan a ni Jehova ti Pagtataudan ti mensahetayo ken iyas-asidegna kenkuana dagiti tattao. (Juan 6:44) Isu a kanayon nga ikararagmo ti nasantuan nga espiritu. Kanayon nga usarem ti Sao ti Dios. Iturongmo ti atension ken Jehova, saan nga iti bagim. Tulongam dagiti agdengdengngeg a maaddaan iti nauneg a panagayat ken Jehova.
Maawiska a mangisuro iti kapatgan pay laeng a mensahe para kadagiti tattao. Agtalekkami nga agballigika bayat nga agpampannurayka iti “bileg nga ipapaay ti Dios.”—1 Ped. 4:11.
Dagiti padayo a mannursuro,
Bagi a Manarawidwid Dagiti Saksi ni Jehova