“Nanhte sara tai ram ma nit dai.” (Heb 5:12) Shingran yu u! Ninggawn tawa ting hta, kaja htum Sara re ai Yehowa gaw, shi a lam kaga masha ni hpe sharin ya na matu, anhte hpe saw shaga nga ai! Dinghku hta, nawku hpung hta, hkaw tsun lawk hta Yehowa hte seng ai teng man lam hpe sharin ya lu ai gaw, laksan ahkaw ahkang hte lit kaba langai mung re. Anhte gara hku awng dang lu na kun?

Timohti hpang de ka ai Kasa Pawlu a laika hta mahtai hpe mu lu ai. Dai hta: “Laika hti yu nna shadum shahprang ai hte sharin shaga ai hta, a shaja nga u.” Pawlu gaw kahtap nna: “Shingrai galaw n yang gaw, na a hkum hpe mung, nang hpe madat mara ai ni hpe mung, nang hkye hkrang la lu na ra ai.” (1 Tm 4:13, 16) Nang hta, asak hkye la lu ai shiga tsun dan na lit nga ai. Dai majaw, ahkyak ai ndai lit hpe galaw lu na matu laika hti ai, sharin ya ai hta rawt jat nga ra ai. Ndai laika buk gaw, nang hpe karum ya lu hkra galaw da ai. Ndai laika buk a hkrang nsam nkau mi hpe yu yu ga.

Yehowa gaw “Grau Htum Ai Sara” re. (Esa 30:22, NW) Ndai laika buk gaw laika hti ai wa hte sharin achyin ya ai wa hku nna, atsam grau rawt jat wa hkra nang hpe karum ya na ra ai. Raitim, anhte tsun ai shiga a Madu gaw Yehowa rai nna, masha ni hpe shi lau la ai lam hpe myit dum u. (Yawhan 6:44) Dai majaw, chyoi pra ai wenyi lu na matu ayan akyu hpyi u. Karai a Mungga hpe chyahkring hkring lang u. Tinang hpe n re ai sha, Yehowa hpe myit maju jung hkra galaw u. Madat nga ai ni, Yehowa hpe myit kraw kata kaw na tsawra wa hkra karum ya u.

Shinggyim masha ni hpe ahkyak htum shiga sharin ya na matu, nang saw shaga hkrum sai. “Karai Kasang jaw da ai n-gun lagaw” hpe nang kam hpa yang, awng dang lu na hpe anhte kam ga ai.​​—⁠⁠1 Pe 4:11.

Nanhte a shingdep shingtau sara ni,

Yehowa Sakse Ni A Uphkang Hpung