Valũa Kuma kwa Nzama Ĩla Ĩtongoesye
“Mwaĩlĩte kwĩthĩwa amanyĩsya.” (Aevl. 5:12) Kwasũanĩa ndeto isu! Yeova, Mũmanyĩsya ũla mũseo vyũ ĩũlũ wa nthĩ, nũtũthoketye tũmanyĩsye ala angĩ ĩũlũ wake! Wĩa o na wĩva wa kũmanyĩsya ũw’o ĩũlũ wa Yeova nĩ kĩanda kya vata na kĩito, twĩthĩwe twĩmanyĩsya andũ ma mũsyĩ, kĩkundinĩ, kana twĩ ũtavany’anĩ. Nĩ kyaũ kĩtonya kũtũtetheesya?
Ũsũngĩo wa ĩkũlyo yĩu wĩ ndetonĩ ii mũtũmwa Vaulo waandĩkĩie Timotheo: “Endeea kwĩkĩa kĩthito kya kũsoma mbee wa andũ, kũtaa, na kũmanyĩsya.” Vaulo ongelile kwasya: “Weeka ũu ũkeetangĩĩa we mwene na ala makwĩthukĩĩasya.” (1 Tim. 4:13, 16) Wĩ na ũvoo wa kũtangĩĩa thayũ waĩle kũtavya ala angĩ. Kwoou, nĩ ũndũ wa vata kwĩkĩa kĩthito wĩthĩwe mũsomi na mũmanyĩsya mũseo. Kavuku kaa kaseũvĩtw’e kaũtetheesye kwĩka ũu. Kwasisya maũndũ o manini katĩ wa ala me kavukunĩ kaa.
Kĩla ĩthangũ yĩ na ĩandĩko. Ĩandĩko yĩu nĩyĩtonya kwĩthĩwa ne mwolooto wa Mbivilia ũkonetye kĩla kĩũneenewa, kana ngelekany’o yonanĩtye ũndũ kĩla kĩũneenewa kĩtonya kũtũmĩwa
Yeova nĩwe “Mũmanyĩsya Ũla Mũnene.” (Isa. 30:20, NWT) O na kau kavuku kaa nĩkeũkũtetheesya wĩthĩwe ũtonya kũsoma na kũmanyĩsya nesa, ndũkolwe kana ũvoo witũ wumĩte kwa Yeova na nĩwe ũkusasya andũ. (Yoa. 6:44) Kwoou voyaa kĩla ĩvinda ũkwate veva mũtheu. Tũmĩaa Ndeto ya Ngai mavinda onthe. Mũkathae Yeova, ĩndĩ tuuwe mwene. Tata ũtetheesye ethukĩĩsya maku mamwende Yeova kuma ngoonĩ.
Ũthoketw’e ũmanyĩsye ũvoo wa vata vyũ ũla waanengwa andũ. Twĩ na mũĩkĩĩo kana weekwatya “vinya ũla Ngai ũnenganae,” ũkeethĩwa ũtonya kwĩka ũu.—1 Vet. 4:11.
Amanyĩsya vamwe nenyu,
Nzama Ĩla Ĩtongoesye ya Ngũsĩ sya Yeova
