Onhumwafo ya dja kOlutuwiliki
Ombiibeli oya ti: “Omwa wana okuninga ovalongindjovo.” (Heb. 5:12) Jehova, oo e li Omuhongi a denga mbada meshito alishe, okwe tu shiva tu kale hatu hongo ovanhu vakwetu kombinga yaye. Okuhonga vamwe oshili kombinga yaJehova oshi li oshinakuwanifwa sha denga mbada nosha kwata moiti, nohatu shi ningi moukwaneumbo, meongalo nosho yo moukalele. Mbela ongahelipi hatu dulu okupondola?
Enyamukulo lepulo olo otali hangwa meendjovo odo Paulus a lombwela Timoteus eshi a ti: ‘Diinina oku va leshela omishangwa noku va kumaida noku va honga.’ Paulus okwa weda ko vali a ti: “Ngeenge to shi ningi, oto lixupifa ove mwene naava tave ku pwilikine.” (1 Tim. 4:13, 16) Otwa humbata etumwalaka olo tali xupifa eemwenyo. Onghee hano, osha fimanenena okuxwepopaleka onghedi yetu yokulesha noyokuhonga. Okambo aka oka nyanyangidwa nelalakano loku ku kwafela. Natu tale ouyelele umwe pauxupi oo tau hangwa mo.
Omushangwa oo tau hangwa pepandja keshe, tashi dulika efinamhango lOmbiibeli, owa pambafana noshitukulwa ile noshihopaenenwa osho tashi yelifa etulomoilonga
Jehova oye “Omuhongi Munenenene.” (Jes. 30:20, NW) Molwaashi okambo aka otake ku kwafele u xwepopaleke ounghulungu woye u li omuhongi, ino dimbwa kutya Jehova oye Odjo yetumwalaka olo hatu udifa noye ha shili ovanhu. (Joh. 6:44) Onghee hano, kala ho ilikana pandjikilile u pewe omhepo iyapuki. Kala alushe ho longifa Eendjovo daKalunga. Kala ho yukifa elitulemo kuJehova, ndele hakwoove mwene. Kwafela ovapwilikini voye va kale ve hole Jehova tashi di komutima.
Omwa shivwa opo mu honge ovanhu etumwalaka olo la fimanenena. Otu na elineekelo kutya ngeenge omwa kala mwe lineekela ‘meenghono odo mwa pewa kuKalunga’ otamu ka pondola. — 1 Pet. 4:11.
Ovahongi pamwe nanye
Olutuwiliki lEendombwedi daJehova
