Еврейлерге 5:12-де пазылча: «Сірерге постарыңа ӱгретчі полыбызарға тус читкіҷе полған». Сағын на кӧр, Иегова, прай тилекейдегі ӱгретчілернің иң чахсы Ӱгретчізі, піске пасхаларын ӱгредерге чахығ пирче! Сӧбіреде, ӧмеде алай искіріг тоғызында Иеговадаңар сынға ӱгреткені уғаа аарлығ паза уғаа нандырығлығ тоғыс. Ол пирген тоғысты хайди идіп аларға?

Нандырығ Павел илҷінің Тимофейге пасхан пічиинде таап аларбыс, ол пасча: «Худай Пічиин тигірибде хығыр, кӧсте, ӱгрет». Пу сӧстерге хоза: «Іди итсең, позыңны даа, сині исчеткеннерні дее арачылап халарзың», — тіпче Павел (1 Тим. 4:13, 16). Піс кізілернің чуртастарын арачылап полар хабарны искірчебіс. Аннаңар чахсы хығырарға паза кізілерні чахсы ӱгредерге ӱгренерге уғаа кирек. Пу брошюра сағаа ол кӧстеге чидіп аларға полыс пирер. Аның пірее пасхаҷыл сариларын кӧр кӧреелер.

Иегова — Илбек Ӱгретчі (Ис. 30:20). Пу брошюра чахсы хығырығҷы паза ӱгретчі поларға полыс пирер. Че кізілерні Иегова позы позынзар чағын итчеткенін паза пу хабар аның хабары полчатханын ундутпа (Иоанн 6:44). Аннаңар, ызых хут сурынып, кӧп арах пазыр. Библиянаң удаа тузалан. Кізінің прай хайиин Иеговазар айландыр, че позыңзар нимес. Исчеткеннерге чӱректерінде Худайға улуғ хыныс ӧскірерге полыс.

Сағаа прай чоннар хаҷан-да искен хабарларның иң аарлығ хабарын искірерге чахығ пирілген. Піс ікінҷілебинчебіс, «Худай пирчеткен кӱске» ізеніп, син пу чахығны толдыр поларзың! (1 Пет. 4:11).

Син осхас ӱгретчілер,

Иегованың киречілерінің Устапчатхан чӧбі