Nkalata Kufuma ku Jibumba Jitangijila
“Mwafwainwa kwikala bafunjishi.” (Hebe. 5:12) Akilangulukaipotu! Yehoba, Mufunjishi wakila, witupa mwingilo wa kufunjisha bantu pe aye. Kimye kyonse kyo tufunjisha bantu pe Yehoba mu kipwilo, mu nyaunda, nangwatu mu kisemi kyetu, twingila mwingilo wanema bingi. Twakonsha kwingila byepi bulongo uno mwingilo?
Mukumbu uji mu byambo mutumwa Paulo byo anembejile Timoti, bya kuba’mba: “Uteshe muchima ku kutanga pa mvula bantu, kukosesha ne kufunjisha bantu.” Paulo wanungilepo’mba: “Mambo mu kuba bino ukepulusha obe mwine ne boba bakumvwa.” (1 Timo. 4:13, 16) Musapwila mambo awama akonsha kupulusha bantu. Onkao mambo, mwafwainwa kutako bingi muchima pa kuba’mba muwamisheko ntangilo yenu ne byo mufunjisha. Uno buloshuwa usakwimukwasha kuba bino. Akimonai bintu bimo biji mu uno buloshuwa.
Pa jipa ponse patendekela lufunjisho paji kinembelo kyamwesha jifunde ja mu Baibolo jakwatankana na lolo lufunjisho nangwa kyamwesha byo baingijishe lolo lufunjisho mu Baibolo.
Yehoba ye ‘Mufunjishi wetu Wakila.’ (Isa. 30:20) Ibyo kuba’mba uno buloshuwa usakwimukwasha kuyuka bya kutanga ne kufunjisha bulongo, bino vulukainga kuba’mba Yehoba ye Mwine mwina ano mambo awama kabiji ye ubena kukoka bantu. (Yoa. 6:44) Onkao mambo, lombainga kwi Lesa kuba’mba emupe mupashi wazhila, kabiji ingijishainga Mambo a Lesa kimye kyonse. Mwafwainwa kutumbijikanga Yehoba kimye kyonse kyo mubena kufunjisha. Ibikaiko kufika bantu pa muchima pa kuba’mba batemwe Yehoba.
Yehoba wimupa mwingilo wanema wa kufunjisha bantu. Kwa kubula ne kuzhinaukatu ne, inge mwaketekela mu “bulume bupana Lesa,” mukengila bulongo uno mwingilo.—1 Pe. 4:11.
Atweba bafunjishi bakwenu,
Jibumba Jitangijila ja Bakamonyi ba kwa Yehoba
