“သုဂ့ၤကဲထီၣ်သရၣ်တဖၣ်.” (ဧ့ၤ. ၅:၁၂) ထံၣ်တမှံကွၢ် ယဟိဝၤယွၤန့ၣ်မ့ၢ် သရၣ်လၢအဂ့ၤကတၢၢ်တဂၤ ဒီးအဝဲကွဲမုာ်ပှၤလၢ ပကသိၣ်လိပှၤဂၤလၢအဂ့ၢ်အကျိၤလီၤ. လၢတၢ်န့ၣ်အဃိ လၢပဟံၣ်ပူၤဃီပူၤမ့ၢ်ဂ့ၤ, တၢ်အိၣ်ဖှိၣ်ပူၤ မ့တမ့ၢ် လၢတၢ်စံၣ်တဲၤတဲလီၤတၢ်ဟီၣ်ကဝီၤအပူၤမ့ၢ်ဂ့ၤ ပမ့ၢ်ဒိးန့ၢ်ဘၣ်​ မူဒါတခါဂ့ၤတခါဂ့ၤလၢ ကသိၣ်လိပှၤဂၤ တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ်န့ၣ်​ မ့ၢ်ဝဲ တၢ်ခွဲးတၢ်ယၤလီၤဆီ ဒီးမူဒါဖးဒိၣ်တခါလီၤ. ပမၤလၢပှဲၤမူဒါအံၤကသ့ဒ်လဲၣ်.

ပကထံၣ်ဘၣ်​ တၢ်သံကွၢ်အံၤအတၢ်စံးဆၢဖဲ တၢ်မၢဖိပီလူးအတၢ်ကတိၤလၢ အအိၣ်ဖဲလံာ်ပရၢလၢအကွဲးန့ၢ် စီၤတံၤမသ့းန့ၣ်လီၤ. စီၤပီလူးတဲဝဲလၢ “ပာ်နသးလၢတၢ်ကွၢ်လံာ်ကွၢ်လဲၢ်, လၢတၢ်သဆၣ်ထီၣ်ပှၤအခံ, လၢတၢ်သိၣ်က့ၤသီက့ၤ တၢ်တက့ၢ်.” အဝဲတဲကဒီးဝဲလၢ “နမ့ၢ်မၤဒ်န့ၣ်ဒီး, နကအုၣ်က့ၤခီၣ်က့ၤနသးဒၣ်နဲ, ဒီးပှၤလၢအနၢ်ဟူတၢ်လၢနၤတဖၣ်လီၤ.” (၁ တံၤ. ၄:၁၃, ၁၆) နအိၣ်ဒီးတၢ်ကစီၣ်လၢ ကမၤပူၤဖျဲးပှၤသးသမူန့ၣ်လီၤ. လၢတၢ်န့ၣ်အဃိ အရ့ဒိၣ်လၢ နကဘၣ်မၤဂ့ၤထီၣ်​ နတၢ်သိၣ်လိနဲၣ်လိ ဒီးဖးအါထီၣ်လံာ်လဲၢ်န့ၣ်လီၤ. လံာ်တဘ့ၣ်အံၤ ကမၤစၢၤနၤဒ်သိး နမၤဒ်န့ၣ်ကသ့အဂီၢ်လီၤ.

ယဟိဝၤယွၤမ့ၢ် “သရၣ်” လၢအဒိၣ်ကတၢၢ်တဂၤလီၤ. (ၡါ. ၃၀:၂၀) လံာ်တဘ့ၣ်အံၤ ကမၤစၢၤပှၤလၢ ပကမၤဂ့ၤထီၣ်ပတၢ်သ့တၢ်ဘၣ်လၢ တၢ်ဖးလံာ်ဖးလဲၢ် ဒီးလၢတၢ်သိၣ်လိတၢ်အဂီၢ်လီၤ. ဘၣ်ဆၣ်​ ပကဘၣ်သ့ၣ်နီၣ်ထီၣ်လၢ တၢ်ကစီၣ်သ့ၣ်တဖၣ်အံၤ ဟဲလၢယဟိဝၤယွၤအအိၣ်​ ဒီးအဝဲမိၤဃီၤပှၤဟီၣ်ခိၣ်ဖိဆူ အအိၣ်လီၤ. (ယိၤ. ၆:၄၄) လၢတၢ်န့ၣ်အဃိ ဃ့တၢ်မၤစၢၤဒ်သိး အကဟ့ၣ်နၤအသးစီဆှံတက့ၢ်. သူလံာ်စီဆှံထီဘိ ဒီးပျဲလၢယဟိဝၤယွၤ ကဒိးန့ၣ်ဘၣ်တၢ်လၤတၢ်ကပီၤတက့ၢ်. တဘၣ်မၤဒ်သိး ပှၤကဆိမိၣ်ဒိၣ်နၤတဂ့ၤ. မၤစၢၤပှၤဒိကနၣ်တၢ်ဖိတဖၣ်​ ဒ်သိးအတၢ်အဲၣ်​ ကစၢ်ယွၤကဒိၣ်ထီၣ်အဂီၢ်တက့ၢ်.

နဘၣ်တၢ်ကွဲမုာ်နၤလၢ နကသိၣ်လိပှၤဂၤလၢ တၢ်ကစီၣ်လၢအရ့ဒိၣ်ကတၢၢ်လၢ ပှၤဟီၣ်ခိၣ်ဖိအဂီၢ်လီၤ. ပနာ်သပှၢ်ကတၢၢ်လၢ နမ့ၢ်ဒိးသန့ၤထီၣ်နသးလၢ “တၢ်ဂံၢ်တၢ်ဘါလၢ ကစၢ်ယွၤဟ့ၣ်လီၤ” နၤန့ၣ်​ နမၤလၢပှဲၤနမူဒါအံၤကန့ၢ်လီၤ.—၁ ပ့း. ၄:၁၁, ခ့ခါစှီၤကျိာ်.

ပှၤလၢအမၤသကိးတၢ်ဒီးနၤ

ယဟိဝၤပှၤအုၣ်အသးတဖၣ်​ အပှၤပၢဆှၢတၢ်ကမံးတံာ်