“Mulyeelete kuba bafundishi.” (Ebu. 5:12) Amuyeeyebo! Yehova—Mufundishi wiinditewo nsengwe yoonse—atotwiita ayi twiishe bamwi pali nguwe! Nciito yakwiisha cancine pali Yehova— mumukwashi, mulibungano, na muncito yakushimikila—ncoolwe cibotu abuumbi alimwi ngumukuli ulemu. Ino inga twacikonsha buyani?

Tulacana cikumbulo kuswa kumaswi mutumwi Paulo ngakalembela Timoti ayi: “Tolelela kubikila maano kukubelenga kubantu baanji, kuyuminisha, akwiisha.” Paulo wakatolelela akwaamba ayi: “ceebo mukucita boobo ulaakulipulusha omwiine alimwi abaabo bakukutika.” (1 Timo. 4:13, 16) Mulicite makani eenga acafwa bamwi kupuluka. Aboobo mulyeelete kubikila maano kukubelenga akwiisha kwanu. Buloshuwa iyi yabambilwa kumucafwa kucita boobo. Mbasu shimwi shitocanikaamo nsheeshi.

Yehova ngo “Mufundishi Munene.” (Isa. 30:20) Nabi kwaamba ayi buloshuwa iyi ilaakumucafwa kuya panembo mukubelenga akwiisha, mutaluubi ayi Yehova ngo Kantupu ka makani ngotushimikila alimwi ngoosenya bantu kuli nguwe. (Joni 6:44) Aboobo, lyoonse mulyeelete kusenga mushimu wakwe usalashi. Amusebenseshe Maswi akwe Lesa lyoonse. Amulengeshe kwaamba ayi bantu banoolumba Yehova, kuteshi kulumba ndimwe. Amushinishe kucafwa mbomutokwiisha kusuna Yehova kuswa panshi lya moyo.

Mwakeetwa kwiisha makani ayandika abuumbi kubantu. Tulishomete kwaamba ayi mulaakuswitilila na ‘mukashome munkusu Lesa nshaapa’.—1 Pita. 4:11.

Sobafundishi nyineenu,

Likoto Litanjilila lya Bakamboni Bakwe Yehova