Вуйлатыше советын серышыже
Еврей-влаклан 5:12 почеламутышто тыге возымо: «Те туныктышо лийшаш улыда». Шоналтыза веле, Иегова — сандалыкыште Эн Сай Туныктышо — мыланна весе-влакым туныкташ ӱшанен пуэн! Кеч ешыште, кеч погынымашыште, кеч таныклыме пашаштат Иегова нерген чыным туныкташ — тиде пеш кугу чап да кугу ответственность. Тиде пашам кузе шуктен кертына?
Вашмутым апостол Павелын Тимофейлан колтымо серышыштыже муына: «Еҥ-влаклан Возымашым лудмылан, каҥашымылан, туныктымылан шкендым пу». Павел тыгак ешарен каласен: «Тыге ыштымет дене тый шкендымат, колыштшо-влакетымат утарет» (1 Тим. 4:13, 16). Каласкалыме уверна еҥ-влакын илышыштым утарен кертеш. Сандене лудмым да туныктен моштымым саемдаш чот кӱлешан. Тиде брошюр саде цельыш шуаш полша. Брошюрын южо ойыртемжым ончен налына.
Кажне уроклан Библий гыч почеламут пуалтеш. Тиде почеламут урокын тӱҥ принципшым але пример гоч тиде принципым кучылтмым ончыкта.
Иегова — Эн Кугу Туныктышо (Ис. 30:20). Тиде брошюр лудметым да туныктен моштыметым саемдаш полша. Но шарне: еҥ-влакым Иегова шке ӱжын конда да увержат тудынак (Иоан. 6:44). Сандене святой шӱлыш нерген шукырак кумал. Библийым чӱчкыдынрак кучылт. Чыла годымат шкендым огыл, а Иеговам шотыш нал. Тыйым колыштшо-влаклан шӱмыштышт Иеговам чот йӧратымым кушташ полшо.
Тыланет калыклан эн кӱлешан уверым каласкалаш пуымо. Ме ӱшанена: «Юмын пуымо вий дене» тый тиде пашам ыштымаште сеҥымашке шуат! (1 Пет. 4:11).
Тыйын гаяк туныктышо-влак,
Иегован Таныкше-влакын Вуйлатыше советышт
