E Kalata Ukufuma kwi Wumba Lino Likatungulula
“Muzipizile ukuwa mwe wakasambilizya.” (Hebe. 5:12) Teyelenganyani! e Yehova, e Kasambilizya muzima munsi na mwi yulu awino watupa umulimo wakusambilizya wanji! Alongo ulukulu ukusambilizya awantu pe Yehova, awa mu lupwa, mwi wungwe na mu mulimo wa kuwizya lelo citapepuka. Uzye tungacita wuli pa kuti twasambilizya icete?
Vino tungacita vyawa mu mazwi yano umutumwa Paulo walembezile Timoti ukuti: “Twalilila ukuwika amano ku kuwazya pa cintuwavule, ukukonkomecezya nu kusambilizya.” Walunzilepo nu kuti: “Amuno ndi ukucita wo-o uliyipususya we mweneco na wano wakukwivwa.” (1 Tim. 4:13, 16) Twawa ni lyasi ilizima ilya kupususya awantu. Awuli umulandu wuno tuzipizile ukutwalilila ukuzifyako imiwazizye ni misambilizizye yitu. Yo-o broshuwa yilimyavwa sana ukuzifyako imiwazizye ni misambilizizye yinu. Mulole vimwi vino vilimo.
Pi sambililo lyonga na lyonga pali iwaliko lino likulanda pa cisinka ca mu Baibolo nanti ica kulolelako ca mu Baibolo cino cilingine ni sambililo.
E Yehova we “Kasambilizya Mukulu.” (Ayize. 30:20) Cingatenga yo-o broshuwa ingamyavwa ukumanya ukuwazya nu kusambilizya icete, mwakwizuka ukuti wino akatusambilizya we Yehova nu kuti awino akaleta awantu mwi wungwe lyakwe. (Yoha. 6:44) Acino mwalenga Yehova ukuti awamipa umuzimu swinya mwawomvya sana Izwi lyakwe pa kuti awantu wamucindika. Mwakwelezya na maka ukwavwa wano mukusambilizya ukutemwa sana Yehova.
E Yehova wamipa umulimo uwucindame nkaninye uwa kusambilizya awantu. Acino tusakuvwilika ukuti nga mwatwalilila ukusuwila “mu maka yano Leza akatupa” mulitunguluka.—1 Pet. 4:11.
Swe wakasambilizya wawuyo,
Iwumba Lino Likatungulula Ilya Nte zya kwe Yehova
