Monekiskia nanmochiuaskej “nantamachtiani” (Heb. 5:12). ¡Xikonnemili! Jiova, akin okachi kuali Tamachtijkej, techyoleua maj tikinmachtikan oksekin keniuj tamati. Titamachtiskej nejon itech nechikol, itech tanojnotsalis uan iniuan tokalyetouanij se ueyi tekit uan se tatiochiualis. Sayoj ke, ¿keniuj uelis kuali titamachtiskej?

Tanankilil tikajsij itech tein Pablo kijkuilouilij Timoteo: “Ximotekitilti ijkon hasta in tonal kuak nejua niajsis. Xikinleerouilij in tokniuan senteixteno in Tajtoltsin de Dios; uan xikinyojyolmajxitijtiu uan xikinmachtijtiu”. Uan no kijtoj: ‘Porin komo tikchiua nijin [...] timomakixtis tejua uan no tikinmakixtis nochi naken mitskakilijtinemiskeʼ (1 Tim. 4:13, 16). Tein tikinmatiltiaj oksekin uelis kinmakixtis. Yejua ika semi moneki maj timochikauakan kuali titaixtajtoltiskej uan titamachtiskej. Nejin amaix mitsonpaleuis ijkon xikonchiua. Maj tikitakan seki taman tein kipia.

Jiova yejua “Ueyi Tamachtijkej” (Is. 30:20). Nejin amaix mitsonpaleuis okachi kuali xiontaixtajtolti uan xiontamachti, sayoj ke amo xikonelkaua ke yejua Jiova akin kitemaka tamachtilis uan kichiua maj taltikpakneminij iuan motokikan (Juan 6:44). Yejua ika, nochipa xikontajtani iyektikatsin espíritu. Nochipa xikontemo tikonkuis iTajtol Dios. Xikonchiua maj kiueyitalikan Jiova uan amo tejuatsin. Xionmochikaua tikonchiuas maj akin mitsonkakij semi kitasojtakan Jiova.

Dios mitsonyoleuani xikonteixmatilti iTajtol, se taman tein motelneki uan tein amo keman moteixmatiltiani kemej axkan. Senkis tikmatij ke kuali tikonchiuas nejon tekit, komo tiontakuaujtamati itech “chikaualis de Dios” (1 Ped. 4:11).

Nanmotekitikaikniuan,

Oloch Taojtokaltianij akin kinixyekanaj iTaixpantijkauan Jiova