Nemejuamej nonekiskia “nentemachtijkej yeskiaj” (Heb. 5:12). ¡Xkonnemili! Jehová, akin kuajli Tlamachtijketl itech nochi tlen onka, techyoleua ika matikinmachtikan oksekimej tlen yotiuelkej itech yejua. Titemachtiskej tlen melauak itech Jehová: ipan tochan, ipan tlanechikojli noso ipan totenojnotsalis, se ueyi tlateochiualistli niman melak ueyi tekitl. San ika, ¿kenon uelis kuajli titemachtiskej?

Pablo, itlatitlankauj Cristo, kinankilia yejuin itech tlen okijkuilouili Timoteo: “Nochipa xmomachtijto tejua titlapouas teixpan, titeyolchikauas, titemachtis”. Sakin okijto: “Tla ijkin tikchiuas, timomakixtis niman no tikinmakixtis on yejuan mitskakiskej” (1 Tim. 4:13, TNM, 16). Kuajli tlajtoltin tlen tikteijliaj kinmakixtia miyek tlaltikpakchanejkej. Ika yejon, melak noneki tokojtiliskej kuajli tiamapouaskej niman titemachtiskej. Yejuin amatlajkuilojli mitspaleuis xchiua yejon. Matikitakan seki itech tlen kuajkui:

Jehová yejua Ueyi Tlamachtijketl (Is. 30:20). Yejuin amatlajkuilojli, melak mitspaleuis kuajli titlaamapouas niman titemachtis ijkon ken noneki, san ika, maka xkilkaua ika tlen tikteijliaj ualeua itech Jehová niman ika yejua akin kichiua ika makinisiuikan tlaltikpakchanejkej (Juan 6:44). Ika yejon, nochipa xtlajtlanili iespíritu santo. Nochipa xtekitilti iTlajtol toTajtsin. Xteititi ika ualeua itech Jehová niman xmotech ualeua. Xchiua nochi tlen tiuelis ika akin mitskakiskej manoskalti ken kitlasojtlaj Jehová.

ToTajtsin yomitsyoleuj xteijli kuajli tlajtoltin tlen melak ueyi kijtosneki tlen xkeman noteijlia ipan tlaltikpaktli. Kuajli tikmatstokej ika, tla tejua titlaneltoka itech “chikaualistli yejuan Dios” kitemaka, tejua uelis tikchiuas (1 Ped. 4:11).

Akin nemouan temachtiaj,

Grupo akin Tlayekana ipan nochi tlanechikoltin