‘Mudi naye gukhala alongeshi.’ (Heb. 5:12) Tangiza gale! Yehowa—Mulongeshi wabalega alongeshi agasue ha mavu—udi gututoga ha gulongesa athu ako mbimbi yenji! Gulongesa giamatshidia giatadila Yehowa—mu fami, mu hungu, nga mu mudimo wa gulongesa—gudi diago luendu luabonga, nu ginemo giakoma. Luholo lutshi tuajiya gulongesa muabonga?

Mvutu idi mu mbimbi jiasonegele mupostolo Pholo gudi Timote egi: ‘Landula gudihana ha gutangela athu mbimbi ya Nzambi, ha guakolesa nu ha guaalongesa.’ Pholo wazuelele luko egi: ‘Gula watshita ngenyi, mbawudihuluisa nu mbawuhuluisa nji athu adi gugutegelela.’ (1 Tim. 4:13, 16) Mbimbi udi mulongesa mbayihuluisa athu. Hene, idi nu ndando egi ukudise luholo luaye lua gutanga nu lua gulongesa. Gamukanda gaga gasonegewe ha gugukuatesa ha gutanga nu gulongesa muabonga. Tutadile ndaga jiazonda jidi mu gamukanda gene.

Yehowa udi “Mulongeshi Wakoma.” (Yesh. 30:20, NWT) Gamukanda gaga mbagagukuatesa ha gukudisa luholo luaye lua gutanga nu lua gulongesa. Uvi, ujimbilago egi Yehowa udi ha gishina gia ndaga tuana gulongesa, muene wana gunana athu. (Yone 6:44) Khala mutoga muavula nyuma yenji yabonga. Khala mukalegela muavula Mbimbi ya Nzambi. Kwatesa athu ha gujiya Yehowa, uvi guatuma ndo ha gugutadila aye hakhaye. Kalagala ngolo ha gula athu adi gugutegelela azumbe Yehowa muavula.

Mbimbi Yehowa wagutuma ha gulongesa athu idi nu ndando yavula gubalega. Tudi nu felela egi luholo udi muzegemena ‘mu ngolo jiana guguhana Nzambi,’ mbawubinga.—1 Phet. 4:11.

Alongeshi n’akuenu,

Hunji dia Akulu-Atuameji dia Matemue a Yehowa