“Kumwail anahne wialahr sounpadahk kei.” (Ipru 5:12) Song medewehla! Siohwa​—Sounpadahk keieu mwahu nanleng oh sampah—​ketin luke kitail en padahkihong meteikan duwen ih! Sohte lipilipil soangen pwukoa en padahki me mehlelo duwen Siohwa​—nan peneinei, nan mwomwohdiso, de nan doadoahk en kalohk—​e wia pwais kaselel oh pwukoa kesempwal ehu. Ia duwen atail kak pweida?

Pasapengo mihmi nan mahsen kan me wahnpoaron Pohl ntingkilahng Timoty: “Pousehlahte nantihong omw pwukoahn wadawad mwohn meteikan, kihda kangoang oh padahk kan.” Pohl kapatahiong: “Ni omw pahn wia met, ke pahn doarehla pein kowe oh pil irail kan me kin rong uhk.” (1 Tim. 4:13, 16) Ke kolokol rohng en komour ehu pwehn ehukihong meteikan. Eri e uhdahn kesempwal ken nantihong kamwahwihala omw kin wadawad oh padapadahk. Kisin pwuhk wet wiawihda pwehn seweseiuk ken wia met. Tehk ekei soahng kan me mi loale:

Siohwa iei “Sounkaweid Lapalapo.” (Ais. 30:20, NW) Ni kisin pwuhk wet eh pahn seweseiuk ken kalaudehla omw koahiek nin duwen sounwadawad emen oh sounpadahk emen, dehr manokehla me Siohwa iei Poahsoanpen atail padahk oh Ih me kin ketin kakerenihedo aramas akan reh. (Sohn 6:44) Ihme kahrehda, ahnsou koaros kapakapki sapwellimen Koht manaman. Doadoahngki Mahsen en Koht ahnsou koaros. Dehr kihda pein omw madamadau, ahpw ahnsou koaros sewese meteikan ren kilang ia sapwellimen Siohwa pepehm oh madamadau duwen ire ehu. Nantihong kakairada nan mohngiong en irail me rongorong kan limpoak laud ong ih.

Ke ale luhk pwehn padahngki rohng me keieu kesempwal me kohiengehr aramas akan. Se likih me ni omw pahn koapworopworki “kehl me Koht ketikihda,” ke pahn pweida.​—1 Pit. 4:11.

Iengomw sounpadahk kan,

Pwihn me Kin Apwalih Mwomwohdiso en Sounkadehdehn Siohwa kan nan Sampah Pwon