“Qankunaqa sumaj yachachejkunaña kanaykichej karqa” (Heb. 5:12). Jehová Diosqa aswan Sumaj Yachachej. Paytaj wajyariwanchej wajkunaman paymanta yachachinapaj. Chayrayku familiapi, congregacionpi, predicacionpi ima Jehová Diosmanta yachacheyqa, ni imawan kikinchakunchu. Yachachinapajtaj mayta kallpachakuna tiyan.

Chayta ruwanapajtaj apóstol Pabloj nisqan yanapawasun. Payqa Timoteoman nerqa: “Diosmanta Qhelqasqata wajkunaj ñaupaqenpi leellaypuni. Wajkunata kallpachay, yachachiytaj [...]. Chayta ruwaspaqa, qan kikiykita salvakunki, jinallataj uyarisojkunatapis”, nispa (1 Tim. 4:13, 16). Noqanchejpis wajkunata yanapayta atinchej salvakunankupaj. Chayrayku sumajta leenapaj, yachachinapaj ima kallpachakunallapuni. Kay folletotaj chaypaj yanapasonqa. Chayrayku kay folleto imayna ruwasqachus kasqanta qhawarina.

Jehová Diosninchejqa Sumaj ‘Yachachejninchej’ (Isa. 30:20). Kay folletoqa yanapasonqa aswan sumajta leenaykipaj, aswan sumajta yachachinaykipaj ima. Ajinapis amapuni qonqaychu Jehová Diosninchej yachachiwasqanchejta, runastapis payman pusamusqanta (Juan 6:44). Jehová Diospa atiyninta sapa kuti mañakuy, Bibliamantapuni yachachiy, Jehová Diosllatataj jatunchay. Chantapis uyarejkunata yanapariy tukuy sonqo Jehová Diosta munakunankupaj.

Jehová Diosqa munan tukuy runas Palabrannejta payta rejsinankuta. Paytaj qanta wajyarisunki paymanta runasman willamunaykipaj. Noqaykoqa yachayku “Dios kallpata qosqanpi” atienekojtiyki, chayta juntʼanaykita (1 Ped. 4:11).

Qankunawan khuska yachachejkuna,

Diospa Llajtanta Kamachejkuna