« Zot i devré èt bann domoun i ansègn lé zot » (Ébr 5:12). Ou rann aou kont : Jéova, Lansénian le plu parfé dann lunivèr, i invit anou, pou alé fé konèt èk lé zot kisa li lé ! Chak lokazion nou néna pou ansègn la vérité su Jéova (dan la fami, dann lasanblé lokal ou dann prédikasion) lé in gran loneur é in résponsabilité vréman inportan. Koman ariv fé sa kom ki fo ?

I trouv le répons dan bann parol ke lapot Pol la ékri pou Timoté : « Kontinué devien plu gabié pou lir devan domoun, pou ankourajé, pou ansénié. » Pol i rajout : « Kan ou fé komsala ou va sov é ou mèm é sak i ékout aou » (1 Tim 4:13, 16). Le mésaj ke ou fé konèt i sov la vi domoun. Sé pousa, lé vréman inportan ke chakèn d’nou i fé zéfor pou lir é i ansénié in fason pluméyeur ankor. La prépar ti liv la pou èd aou fé sa mèm. Ala detroi zafèr ke ou va trouvé ladan :

Jéova lé le « Gran Linstrukteur » (Izai 30:20). Mèm si ti liv la i èd aou devnir plu gabié dan out fason lir é ansénié, oubli jamé ke sak nou ansègn i sort koté Jéova é ke sé li ki atir bann domoun (Jan 6:44). Pousa mèm, pri ali souvan pou demann ali léspri sin. Ansèrv in bonpe son Parol. Atir latansion domoun su Jéova, é jamé su ou. Fé zéfor pou fé nèt lamour pou Jéova dann keur bann domoun lapou ékout aou.

Ou lé invité pou alé ansègn le mésaj le plu inportan ke la donn domoun pou anonsé. Nou lé vréman sur, ke si ou apui aou « su la fors ke Bondieu i donn », ou va fé sak la demann aou kom ki fo (1 Pièr 4:11).

Nou lé uni ansanm ou dan se laktivité lansègnman,

Kolèj santral bann Témoin Jéova