Ljil ando Vodeće telo
„Valjani te oven učiteljija“ (Jevr. 5:12). Zamislin odova! O Jehova, o najšukar Učitelj ko celo svemir, vičini amen te sikava averen oljestar! Te sikava averen ando Jehova tani bari čast hem odgovornost, bilo te čera odova ki familija, ki skupština ja ki služba. So ka pomožini amen te ova šukar učiteljija?
O odgovor šaj te arakha ko Pavlese lafija kola pisija e Timotejese: „De sa tutar te čitine anglo avera, te ohrabrine, te sikave.“ Isto adžahar, o Pavle pisija: „Ked čereja odova ka spasine hem tut hem okoljen so šunena tut“ (1. Tim. 4:13, 16). O haberi kova vačereja averendže šaj te spasini oljengo dživdipe. Odoljese tano but važno te sikljove sa pošukar te čitine hem te sikave. Akija brošura tani čerdi te pomožini tut ko odova. Ače nekobor buča so isi ano late.
Ki svako strana isi jekh biblijako stih kova mothovi o načelo koljestar vačeri i lekcija ja primer sar šaj te čerel pe ki odija lekcija
O Jehova tano „Baro Učitelj“ (Is. 30:20). Iako akija brošura ka pomožini tut pošukar te čitine hem te sikave, niked ma bistre so o haberi kova vačeraja avela ando Jehova hem so ov cidela e manušen nakro peste (Jov. 6:44). Odoljese uvek molin tut e Jehovase te del tut po sveto duho. De sa tutar te koristine e Devljeso Lafi. Niked ma vačer odova so tu mislineja, nego uvek pomožin averendže te dikhen sar o Jehova razmislini hem sar osetini pe ked čeraja diso. Pomožin averendže te bajačeren poklo mangipe premalo Jehova.
Isi tut čast te vačere o najvažno haberi kova tano dindo e manušendže. Amen hijam uverime so šaj te čere odova, adžahar so ka muke tut „ko zoraljipe kova dela o Devel“ (1. Petr. 4:11).
Teklje saradnikija ki služba,
O Vodeće telo ando Jehovase svedokija
