Papela Ledzri Pfaka Ka Huvo Leyi Zrangelaka
‘N’wi fanekela ku va vadondzrisi’. (Hb 5:12) Yanakanya hi leswi! Yehovha—Mudondzrisi lwenkulu a wuyakweni hinkwabyu—a hi zramba leswaku hi dondzrisa van’wana mayelanu na yene! Xiyavelo xini na xini xa ku dondzrisa xihlayelamfuzri ha Yehovha—a nga ha va a ndangwini, a bandleni kumbe a ntizrweni wa nsimu—i ndjombo ya ku hlawuleka nakone i wutiyanguleli byikulu. Xana hi nga humelela hi ndlela yini?
Nhlamulo yi kumeka ka mazritu lawa Pawulo a ma tsraleliki Timoteo loko a ku: ‘Tinyikete ku dondzreni, ni ku khongoteleni, ni le ku dondzriseni.’ Pawulo a yengesele leswi: ‘Hikusa loko u yentxa leswo, u ta tihuluxa wene ni lava ku yingelaka.’ (1Tm 4:13, 16) Wene u tamele madzrungula ya ku huluxa wutomi lawa u fanelaka ku ma hangalasa. Kutani i swa lisima kuva u yampswisa madondzrela ni madondzrisela yaku. Xibukwana lexi xi yentxeliwe ku ku pfuna ku yentxa leswo. Vona switsrongo leswi xi nga naswu.
Tsralwa ledzri tsrhahiwiki ka tluka ha dzrin’we dzri kombisa nsinya wa nawu wa Bibele kumbe xikombiso xa yinhla ya dondzro leyi ku tizreliwaka ka yone.
Yehovha i ‘Mudondzrisi Lwenkulu’. (Eza 30:20, NM) Leswi xibukwana lexi xi taka ku pfuna ku yampswisa wuswikoti byaku swanga mudondzri ni mudondzrisi, u nga dzrivale leswaku Yehovha hi yene Xihlovo xa madzrungula yezru ni leswaku hi yene a kokaka vhanu. (Yh 6:44) Hi kola ka leswo, khongota minkama yinyingi u kombela moya wa ku xwenga. Tizrisa ngopfu Zritu dzra Xikwembu Nkulukumba. U nga kokele lidzrumu kwaku kambe dzri kokele ka Yehovha. Lwela ku yaka lizrandzru dzra ku yenta ha yene a timbilwini ta vayingiseti vaku.
U zrambiwile leswaku u dondzrisa madzrungula ya lisima swinene lawa vhanu va nga samangakiki va ma yingela. Hi ni ku dumba ka leswaku loko u tiseketela ‘hi ntamu lowu Xikwembu Nkulukumba a ku yavelaka’ wone, u ta humelela.—1Pe 4:11.
Vadondzrisi-kuloni,
Huvo Leyi Zrangelaka Ya Timboni Ta Yehovha
