“Ala lingbi fade ti ga awafango ye.” (aHéb. 5:12). Bâ ma! Jéhovah, so ayeke Maître so ahon amaître kue ti dunia so la atisa e ti fa ye na ndö ti lo na azo! Lege kue so azi na e ti fa tâ tënë na ndö ti Jéhovah, atâa na yâ ti sewa, na yâ ti congrégation wala na fango tënë, ayeke mbeni kota pasa mingi nga mbeni kota kua. E lingbi ti sara ni nzoni tongana nyen?

Kiringo tënë na hunda so asigi na yâ ti atënë so bazengele Paul atene na Timothée: “Ti ku na singo ti mbi, mo ngbâ ti mû bê ti mo kue na dikongo mbeti na gbele azo, na mungo wango na ala nga na fango ye na ala.” Paul akiri atene: “Na sarango tongaso mo yeke sö ande mo wani nga na ala so ayeke mä mo.” (1 Tim. 4:13, 16). Mo yeke na mbeni tokua ti fa na azo, tokua so na lege ni si azo ayeke sö fini ti ala. Tongaso, a yeke kota ye mingi ti tene mo maï akode ti mo ti dikongo mbeti nga na ti fango ye na azo si aga nzoni. A sigi na brochure so ti mû maboko na mo ti maï na akode ni so. Zia e bâ aye so ayeke na yâ ti brochure so.

Jéhovah ayeke “Kota Maître”. (És. 30:20). Na ngoi so brochure so ayeke mû ande maboko na mo ti maï akode ti mo ti dikongo mbeti nga na ti fango ye na azo, girisa lâ oko ape so Jéhovah la ayeke wa ti tokua so e yeke fa ni nga lo la lo yeke gboto azo na mbage ti lo (Jean 6:44). Tongaso, sambela lakue ti wara yingo vulu. Sara kua mingi na Mbeti ti Nzapa. Gboto lê ti azo na ndö ti Jéhovah, me na ndö ti mo pëpe. Sara kue ti yôro ndoye ti Jéhovah na yâ ti bê ti azo so mo yeke fa ye na ala.

A tisa mo ti ga ti fa mbeni kpengba tokua so ade a mû na azo lâ oko ape ti sara ni. E yeke na confiance so tongana mo zia bê ti mo na ndö ti “ngangu so Nzapa ayeke mû” mo yeke sara kua ni nzoni.​—1 Pi. 4:11.

Amba ti mo awafango ye,

Bebungbi ti aTémoin ti Jéhovah