„Un tuu bi sa bia ko leima ta lei otowan” (Heb. 5:12). Pakisei di soni aki! Jehovah, di möön bunu Leima u hii di mundu, kë fuu lei woto sëmbë soni fëën! Hiniwan faantiwöutu di de da u fuu lei sëmbë soni u Jehovah, ee a di wosudendu fuu, ee a di kemeente, nasö ee a di peleikiwooko, da wan apaiti gaandi, söseei wan gaan faantiwöutu. Unfa u sa du ën a wan bunu fasi?

U sa feni di piki a di biifi di apösutu Paulosu bi sikifi manda da Timoteo. A bi piki ën taa: „I musu ta mbei möiti u ta lesi da sëmbë, u ta da de degihati, söseei u ta lei de soni.” Paulosu bi taki söseei taa: „Te i ta libi sö kaa nöö joo puu i seei a hogi basu, i ku dee oto sëmbë dee ta haika i dë tuu” (1 Tim. 4:13, 16). I abi di wooko u paaja wan buka di o tjubi sëmbë libi. Fëën mbei a dë fanöudu fii mbei möiti fii ko sa’ u lesi möön bunu, söseei fii ko sa’ u lei sëmbë soni möön bunu. De mbei di brochure aki u heepi i fii sa du dee soni dë. Luku wantu soni di dë nëën.

Jehovah da di „Möön Gaan Leima” (Jes. 30:20). Hii fa di brochure aki o heepi i fii ko toon wan möön bunu lesima ku wan möön bunu leima, tökuseei ja musu fëëkëtë taa a Jehovah di bosikopu di u ta paaja ta kumutu, söseei taa hën ta hai sëmbë ko nëën (Joh. 6:44). Fëën mbei hii juu i musu ta begi Gadu faa da i di santa jeje fëën. I musu ta wooko ku di Bëibel hii juu. Be dee haikama si kuma Jehovah hën ta fan ku de, ma na ju. Mbei möiti u heepi dee haikama u de ko möön lobi Jehovah.

I feni di möön gaan wooko di libisëmbë sa feni, hën da u lei sëmbë soni u di möön fanöudu bosikopu. U dë seiki taa ee i buta i futoou a „di kaakiti di Gadu ta da sëmbë”, nöö hii soni o go bunu.​—1 Pet. 4:11.

Dee woto leima kuma i,

Di Tii Kulupu u Jehovah Kotoigi