“Ma ne lu mbatesen.” (Heb. 5:12) Yehova u a lu Ortesen u hemban sha won cii la kaa ér se tese mbagenev kwagh na! Nenge kwagh u doon sha wono! Aluer se mba tesen ior mimi sha kwagh u Yehova hen tsombor shin ken tiônnongo shin ken kwaghpasen kpa, iantom ne ka i icivirigh tsung shi ka tom u kiriki ga. Se za ikyura ken tom ne nena?

Mlumun ngu ken washika u apostoli Paulu nger hen Timoteu la, ér: “Ver ishima u ôron ior Bibilo man u wan kwagh man shi u tesen zan zan.” Paulu shi kaa ér: “Aluer ú er nahan yô, ú yima iyol you kua shi mba ve lu ungwan we la kpaa.” (1 Tim. 4:13, 16) U ngu a tom u samber a loho u waren uma. Sha nahan yô, ka hange hange u u seer fan takerada u ôron man ityesen. I er antakerada ne sha gbenda u una wase u u eren kwagh ne yô. Time ase sha akaa kpuaa a i dugh a mi ker ne.

Ortesen môm kpa fa ityesen er Yehova nahan ga. (Yobu 36:22) Er u ôron takerada shi u tesen ior yô, antakerada ne una wase u u seer fan takerada u ôron man ityesen, kpa mayange i de hungur we er loho wase ne u dugh hen Yehova shi i lu un a urugh ior ga. (Yoh. 6:44) Sha nahan yô, hemban eren msen wer a na u icighan jijingi. Eren tom a Mkaanem ma Aôndo hanma shighe. Wase ior ve hemba veren ishima ve sha Yehova, i de lu sha a we ga. Nôngo wase ve, Yehova a doo ve ishima tsung.

I lôhô u ér u va pase ior loho u hemban cii u i lu ôron uumace la. Se mba a vangertiôr ser, aluer u suur “sha agee a Aôndo A ne” la yô, u za ikyura.—1 Pet. 4:11.

Ka se mbatesen a ven imôngo,

Mbahemenev mba Shin Itine