‘Nyu pombaka monga embetsha.’ (Hɛb. 5:12) Ohokanyiya dia Jehowa, Ombetsha woleki tshɛ l’andja w’otondo ambotɔlɔmba dia mbetsha anto awui wendana la nde! Ɔkɛndɛ tshɛ wendana la mbetsha akambo wa mɛtɛ wa Jehowa, oyadi lo nkumbo, l’etshumanelo kana l’olimu w’esambishelo ekɔ diɛsɛ dia nɛmɔ efula ndo ɔkɛndɛ wa woke! Ngande wakokaso ntondoya?

Okadimwelo tanemaka l’ɛtɛkɛta wakafundɛ ɔpɔstɔlɔ Pɔɔlɔ Timɔte ate: “Otetemale ndjasha lo wadielo wa lo sɛkɛ, lo olakelo ndo lo wetshelo.” Pɔɔlɔ akakotsha ate: “Lo nsala ngasɔ, wɛ ayoyashimbɛ ndo ayoshimbɛ wanɛ wakohokamɛ.” (1 Tim. 4:13, 16) Wɛ ekɔ la losango lashimbɛ nsɛnɔ la mbewoya anto. Diakɔ diele, ekɔ ohomba mbidja welo dia ndowanya wadielo ndo wetshelo ayɛ. Biukubuku nyɛ yakalɔngɔswama dia kokimanyiya dia nsala dui sɔ. Tende awui amɔtshi wele lɔkɔ.

Jehowa mbele ‘Ombetsha wa Woke.’ (Isa. 30:20) Kaanga mbayokokimanyiya biukubuku nyɛ dia ndowanya akoka ayɛ wa mbadia ndo wa mbetsha, tohɛke pondjo dia Jehowa mbele Kiɔkɔ ya losango laso ndo di’ɔnɛ nde mbakotola anto. (Jni. 6:44) Ɔnkɔnɛ, lɔmbaka mbala efula dia nkondja nyuma k’ekila. Kambaka mbala efula l’Ɔtɛkɛta wa Nzambi. Kotolaka yambalo y’anto le Jehowa, aha le yɛ. Sala la wolo dia mbidja lo etema w’ampokami ayɛ ngandji k’efula ka Jehowa.

Wɛ akelamɛ dia nsambisha losango loleki tshɛ ohomba lakoka anto nongola. Tekɔ l’eshikikelo dia naka wɛ mendɛ “lo wolo washana Nzambi,” kete wɛ ayotondoya.​—1 Pe. 4:11.

Asekayɛ embetsha,

Olui-walɔmbɔla w’Ɛmɛnyi wa Jehowa