Kalata Yakutuliya ku Wupu Wakulongozga
“Mungwenere kuja asambizi.” (Ahe. 5:12) Aŵanaŵaniyani fundu iyi! Yehova yo ndi Msambizi wamampha ukongwa kuluska weyosi mu chilengedu chosi, watitipempha kuti tisambizengi ŵanthu anyaki vakukwaskana ndi iyu. Kusambiza ŵanthu uneneska wakukwaskana ndi Yehova, kaya ndi m’banja, mumpingu pamwenga mu uteŵeti, ndi mwaŵi ukulu ukongwa kweniso mbudindu ukulu. Kumbi tingafiska wuli?
Kwamuka kwa fumbu ili kusanirika mu mazu ngo wakutumika Paulo wangulembe Timoti kuti: “Lutirizga kujipereka pa nkhani ya kuŵerenga pa gulu la ŵanthu, kuchiska ndipuso kusambiza.” Paulo wangulemba so kuti: “Pakuti asani uchita viyo, ujitaskengi wamweni ndipuso utaskengi wo atuvwa vo usambiza.” (1 Timo. 4:13, 16) Uthenga wo mukhumbika kusambiza ŵanthu ungaziŵawovya kuti azitaskiki. Mwaviyo, mukhumbika kulutirizga kusazgiyaku lusu linu pakuŵerenga ndipuso pakusambiza. Kabuku yaka kakunozgeka kuti kakuwovyeni kufiska venivi. Wonani vinthu vinyaki vo ve mukabuku yaka.
Papeji lelosi pe lemba lo lilongo fundu ya m’Bayibolu yo yikoliyana ndi sambiru lo pamwenga lilongo mo tingagwiriskiya ntchitu fundu za mu sambiru lo
Yehova ndi ‘Msambizi Mura.’ (Yesa. 30:20) Kabuku yaka kakuwovyeningi kuti musazgiyeku lusu linu pakuŵerenga ndipuso pakusambiza. Chinanga kuti ve viyo, mungaluwanga cha kuti Yehova ndiyu Mweneku wa uthenga wo tisambiza ndipuso kuti iyu ndiyu waguza ŵanthu. (Yoha. 6:44) Mwaviyo, nyengu zosi mumupemphengi kuti wakupaskeni mzimu wakupaturika. Mugwiriskiyengi ntchitu Mazu Ngaku Chiuta. Mungakambanga maŵanaŵanu nginu cha kweni nyengu zosi mukambengi maŵanaŵanu ngaku Yehova. Ndipu muyesesengi kuwovya ŵanthu wo mutiŵasambiza kuti amuyanjengi ukongwa Yehova.
Mukupaskika ntchitu yakusambiza ŵanthu uthenga wakukhumbika ukongwa kuphara uthenga wewosi wo ŵanthu akupaskikapu. Te ndi chigomezgu chakuti asani muthemba “nthazi yo Chiuta wapereka,” mufiskengi.—1 Petu. 4:11.
Ndisi asambizi anyinu,
Wupu Wakulongozga wa Akaboni aku Yehova
