Lugwalo Luzwa kuKabunga Keendelezya
‘Mweelede kuba bayiisi.’ (Heb. 5:12) Amuyeeye buyo, Jehova Muyiisi uumaninide muzintu zyoonse, ututamba kuti tuyiisye bamwi atala anguwe! Kufumbwa mulimu ngutupegwa wakuyiisya bantu atala aJehova mumpuli, mumbungano amumulimu wakukambawuka nchilongezyo chipati loko pesi mukuli muyumu. Kujana twawukonzya biyeni?
Nsandulo twiijana mumajwi mwaapostolo Pawulu ngaakalembela Timotewo aakuti: ‘Sungwaala kukubala aantanganana, kukusungwaazya akukuyiisya.’ Alubo wakayungizya kuti: “Nkaambo wanoocita bobuya, inga ulalifutula omwini, abalo bakumvwa ulabafutula.” (1 Tim. 4:13, 16) Waambilizya mulumbe uupa buumi. Nkinkaako, kuyandikana kuti uyungizye luzibo mukubala amukuyiisya. Kabbuku aaka kakalembelwa kuti kakugwasye kuchita oobo. Atulange-lange zimwi zili mukati.
Lugwalo lubikkidwe mupeji imwi ayimwi ninjiisyo yamuBbayibbele naakuti nchikozyano cheendelana achiiyo chilikuyiigwa
Jehova ‘Muyiisi Mupati.’ (Is. 30:20) Nikuba kuti kabbuku aaka kakugwasya kuti uyungizye luzibo lwako mbukunga ulisikubala amuyiisi pesi utalubi kuti Mwini mulumbe ooyu nguJehova akuti nguwe uukwela bantu. (Joh. 6:44) Nkinkaako, komba kuli Jehova kuti akupe muuya uusalala. Chiindi choonse belesya Bbayibbele. Syoma Jehova kutali maanu aako. Gwasya baswiilizi kuti bayande Jehova amoyo woonse.
Wakatambwa kuti uyiisye mulumbe uuyandikana loko wakapegwa bantu kuti bawubeleke. Tusyoma kuti uyoozwidilila akaambo ‘kanguzu nzyakupa Leza.’—1 Pet. 4:11.
Tubayiisinyokwe,
Kabunga Keendelezya kaBakamboni baJehova
