“Mukwenera kuŵa ŵasambizgi.” (Heb. 5:12) Ghanaghanirani waka! Yehova, uyo ni Msambizgi muwemi chomene pa charu chose chapasi, wakutipempha kuti tisambizgenge ŵanji. Mulimo uliwose uwo tingapika kuti tisambizgenge ŵanyake unenesko wakukhwaskana na Yehova, kwali ni mu mbumba, mu mpingo, panji mu uteŵeti, ngwakuzirwa chomene ndipo ni mwaŵi ukuru. Kasi tingachita wuli kuti tifiske mulimo uwu?

Zgoro tikulisanga mu mazgu agho mpositole Paulosi wakalembera Timote kuti: “Lutilira kuŵazga pa wumba, kuchiska, na kusambizga.” Paulosi wakalembaso kuti: “Usange ukuchita vinthu ivi, ujiponoskenge wekha na awo ŵakukupulika.” (1 Tim. 4:13, 16) Muli na uthenga wakuponoska umoyo uwo mukwenera kuphalirako ŵanyake. Ipo ntchakuzirwa chomene kuti musazgireko luso lwinu lwakuŵazga na kusambizga. Burosha ili lapangika kuti limovwirani pa nkhani iyi. Wonani vinyake ivyo vili mu burosha ili.

Yehova ni ‘Msambizgi withu Mukuru.’ (Yes. 30:20) Nangauli kabuku aka kamovwiraninge kuti musazgireko luso lwinu lwakuŵazga na kusambizga, kweni kuluwa yayi kuti Yehova ndiyo Mweneko wa uthenga withu kweniso ndiyo wakuguzira ŵanthu ku gulu lake. (Yoh. 6:44) Ntheura, nyengo zose lombani mzimu utuŵa. Mugwiliskirenge ntchito mwakukwana Mazgu gha Chiuta. Wovwirani ŵategherezgi ŵinu kuti ŵachindikenge Yehova, imwe yayi. Ŵikanipo mtima kuti nyengo zose movwirenge ŵategherezgi ŵinu kuti ŵamutemwenge chomene Yehova.

Yehova wamupemphani kuti musambizgenge ŵanthu uthenga wakuzirwa chomene. Tili na chigomezgo kuti para muthembenge “nkhongono izo Chiuta wakupeleka,” mbwenu mufiskenge mulimo uwo wamupani.—1 Pet. 4:11.

Ndise ŵasambizgi ŵanyinu,

Wupu Wakulongozga wa Ŵakaboni ŵa Yehova