“Lingi alongisi.” (Va Hev. 5:12) Sokolola handi! Yehova Ulongisi wa velapo voluali luosi, wa tu laleka oco tu longise omanu catiamẽla kokuaye! Upange woku longisa ocili catiamẽla ku Yehova, ci kale vepata, vekongelo ale kupange woku kunda, esumũlũho kuenda ocikele cinene. Pole, tu kala ndati alongisi vawa?

Etambululo liaco li sangiwa volondaka upostolo Paulu a sonehela Timoteo viokuti: “Amamako oku litumbika koku tangela omanu, koku lungula kuenda koku longisa.” Paulu wamisako hati: “Poku ci linga o lipopela ove muẽle kuenda vana va ku yeva.” (1 Tim. 4:13, 16) Ove o kuete esapulo limue li popela omuenyo o sukila oku sandeka. Omo liaco, ci kuete esilivilo oku mioñoloha koku tanga kuenda koku longisa kuove. Ombrochura yilo, ya sokiyiwila oku ku kuatisa oku ci linga. Kũlĩhĩsa akuatiso amue a sangiwamo.

Ka kuli ulongisi wa lisoka la Yehova. (Yovi 36:22) Ndaño okuti ombrochura yilo yi ka ku kuatisa oku mioñolola uloño wove koku tanga kuenda koku longisa, ku ka ivaleko okuti, Yehova eye Ono yesapulo lietu haeye o koka omanu. (Yoa. 6:44) Omo liaco, likutilila olonjanja viosi oku pinga espiritu sandu. Talavaya Londaka ya Suku olonjanja viosi. Tiamisila esivayo ku Yehova okuti kokuove muẽle sio. Kuata ocimãho coku kuatisa omanu oku sola Yehova lutima wosi.

Wa lalekiwa oku linga upange wa velapo omunu a pondola oku tambula okuti: oku longisa ocili ca Yehova. Nda wamamako oku kolela “kongusu yi tunda ku Suku,” ocili okuti o ka kala ulongisi uwa.—1 Pet. 4:11.

Olondingupange kumue lene,

Osungu Yolombangi Via Yehova