“Wuna suppose to be teachers.” (Heb. 5:12) Think-am! Jehovah, the best Teacher for heaven and the whole earth invite us to teach people about him! Any assignment to teach the truth about Jehovah whether for family, for congregation, or for field service, na big privilege and work wey we suppose take serious. How we fit succeed with this kind assignment?

The answer dey for wetin apostle Paul tell Timothy. E talk say: “Continue to put all your heart for how you de read for public, how you de encourage, how you de teach.” Paul still talk say: “As you de do this one, you go save yourself and those wey them de listen to you.” (1 Tim. 4:13, 16) This message wey you de preach de save life. So e dey very important to improve how we de read and teach. This brochure go help you do that one. See some things for this brochure.

Na Jehovah be our “Teacher wey e high pass.” (Isa. 30:20) Na true say this brochure go help you improve how you de read and teach, no forget say na Jehovah get this message and na him de draw people to himself. (John 6:44) For this reason, pray for holy spirit. Use Bible well. Direct the praise to Jehovah, no be to yourself. Help people see why they need to get deep love for Jehovah.

Jehovah don invite you to teach the message wey e dey important pass. We believe say as you de depend on “the power wey God de give,” you go succeed.​—1 Pet. 4:11.

We be wuna fellow teachers,

Governing Body of Jehovah Witness