Guiich ni raxel Tidxó Buñ ni nap xiroʼ Galnan ni Rasanir
Lóoto ma «non ñacto mextra» (Heb. 5:12). ¡Colgonysi pensary! Jehová, Mextra ni rasuidy más galán ló guidopynac Gudxlio né guibá, cayaiby lóono guisuidyno buñ. Toib privilegio né toib dxiin rodann láani guisuidyno xfamilno, lainy congregación o saano yoʼ por yoʼ guisuidyno a stipnés de Jehová. Per ¿ximod labúu guidxin gacno toib galán mextra?
Galrranabdiitz reʼ rarexani ló diitz ni bicaʼ apóstol Pablo par Timoteo: «Buny por goʼol lo galán xtiitz Dios nisló buñ, gocné layibu gonyibu cós tzaay né bisuidy layibu». Né de ngú bicaʼbu: «Pal ronylo láani scú, salaalo looyca né salaa buñ ni racadiag looy» (1 Tim. 4:13, 16). Xtiitz Dios ralaani buñ. Por ngú nigolú rasac gonyno dada rutirigaʼlni lóono por goʼoltzayno né gacno toib galán mextra. Follet reʼ sacné looy gonylo ngú. Guibiʼno ximod nac follet reʼ.
Sitnéni texto ni rareʼ ló la Biblia, ló textocu sieed toib litz o toib ejemplo ni radzak né tigaaga lesiony.
Diti noʼ stoib «mextra» xomod Jehová (Is. 30:20). Follet reʼ sacnéni looy goʼol lo más sacró né guisuidylo buñ más galán, per diti guialadxlo que casuidylo buñ xtiitz Jehová né láabu ronybu que buñ guibigax ronoʼbu (Juan 6:44). Por ngú guirága ór gonab espíritu santo xtunybu. Guirá ór, biquiin Xtiitz Dios. Dipa guisuidylo ni ritzanlósi ló xpensarylo, xalagary ngú gocné buñ gandxiʼ né gony pensary xomod Jehová.
Dios ma biruʼ looy guisuidylo buñ toib mensaje ni nigolú rasac. Nandxichdo que pal naplo confianz ló «fuers ni Dios raduidy», labúu sonylo láani (1 Ped. 4:11).
Ni racné lóoto ló dxiin reʼ,
Tidxó Buñ ni nap xiroʼ Galnan ni Rasanir nisló testigos xtuny Jehová
