Opharihela Phaama Makoho
YOOHUSERYA 3
Opharihela Phaama Makoho
ECHU YAWEERYA: Mpake makoho wi etannye nchuno, othokororya ni oowiriyana anyu ni ocicimiherya miyaha soochuneya.
MUKHALELO WA WEERANO:
● Mpake makoho oocicimiherya. Mpake makoho anahaala waakhaviherya alipa oowiriyana wuupuwelela ni ochuna osuwela sincipale.
● Mathowa a opaka nikoho. Mwaakhaviherye alipa oowiriyana ochariha mwaha munalocaanyu moorweela wa opaka makoho anakeriha makuchuwelo aphaama.
● Mucicimiherye miyaha sookhweleya. Mpake makoho ootannya nchuno wi mpaceryihe muupuwelo wookhweleya. Mpharihele makoho awuuluulela mmanle othokororya mwaha wookhweleya naari vaavaa munakwaasanyu oloca.
Mmanle waalakhanya yoorepa, pharihelani makoho wi mucicimiherye yoolakelela etokweene ya yoorepa naari soorepa seiho mwaalakhannyaanyu.
[Ekaaxa va epaaxina 6]
MMUTEKO WOOLALERYA
Mmukohe oowiriyana anyu wi aloce muupuwelo awe vooloca sa mwaha. Nwiriyane moomaleleya naakhulo nawe. Muupuwelele elukuluku ni mukhalelo wa opaka makoho oocicimiherya.
