UWUHRẸ AVỌ 4
Oghẹrẹ nọ U Fo nọ A rẹ rọ Ta kẹ Ahwo re A Rovie Ebaibol
Matiu 22:41-45
OWARE NỌ O GWỌLỌ: Kake ruẹrẹ iroro ahwo nọ a be gaviezọ kẹ owhẹ na kpahe kẹ oria ikere nọ whọ gwọlọ se na.
EPANỌ A RE RO RU EI:
-
Riẹ oware nọ o be lẹliẹ owhẹ se ikere na. Jọ oghẹrẹ nọ whọ te rọ ta kẹ ae nọ a rovie oria Ebaibol jọ u fiobọhọ kẹ ae muẹrohọ ugogo oware nọ whọ gwọlọ rọ via no oria Ebaibol yena ze.
-
Rehọ ẹme ra no Ebaibol na ze. Whọ tẹ be ta ẹme kugbe ahwo nọ a rọwo Ọghẹnẹ, si iroro ahwo na kpohọ Ebaibol na evaọ oghẹrẹ nọ u dhesẹ nọ “Ẹme Ọghẹnẹ” ọ rrọ, ere oruo u re dhesẹ nọ evaọ Ebaibol na areghẹ nọ ọ mae rro ọ rrọ.
-
Kpare isiuru ahwo kẹ oria ikere na. Nọ onọ nọ oria Ebaibol yena o te kuyo riẹ, fodẹ ẹbẹbẹ hayo uyero jọ nọ oria Ebaibol yena o sai jo fiobọhọ kẹ omai riẹ oware nọ u fo eruo, hayo oware nọ ma rẹ sai wuhrẹ no iku oria yena ze.
