ISAMBILILO 4
Ukuletako Icete Amawaliko
Mateyu 22:41-45
IVISINKA IVYA KWIZUKA: Pano mutani muwazye iwaliko, landaniko vimwi vino vingalenga iwumba livwambisye ukwivwa vino vili pi waliko.
IVYA KUCITA:
-
Manyani umulandu wuno mukuwazizya iwaliko. Letaniko iwaliko mu nzila yino yingalenga iwumba ukwiluka zuwa icisinka cino cili pi waliko.
-
Lekani wamanye ukuti mukulanda ivya mwe Baibolo. Nga mukulanda kwe wano wazumila mwe Leza, pa kulanda pe Baibolo, mungawomvya amazwi ya kuti Izwi lya kwe Leza, pa kulanjizya ukuti amuno mukafuma amano.
-
Landani vino vingalenga wavwambisye ukuwazya iwaliko. Wuzyani iwuzyo lino iwaliko lyandi lyasuke, nanti intazi yino Baibolo yingatwavwa ukumala, nanti landani pa cisinka cimwi ica mu Baibolo cino iwaliko lino mukulonda ukuwazya lyandi lyavwe iwumba ukwivwicisya.
