Katauraoi raoi. Iangoia bwa e aera ngkai e koreaki te rongorongo anne. Kataneiako ni wareki taiani kibuntaeka ao tiaki tii te taeka teuana ma teuana. Taraia bwa ko na aki karin taeka, ko na aki katikui, ke n onei mwia n taeka tabeua. Tarataraa raoi te komwa, te biriari, ke te titiraki, ao tabeua riki.

Atonga te taeka teuana ma teuana n te aro ae eti. Ngkana ko babanga n atonga te taeka teuana, ongora ni warekana are e a tia n raweaki, ke bubutii buokam iroun ane e rabakau ni wareware.

Taetae n te aro ae mataata. Atongi raoi taeka, kaeta atum, ao kaurea raoi wim. Kataia ni katiribwarei raoi taeka nako.